Meksıkada 14 jasar jasóspirim Facebook arqyly kisi óltirýge tapsyrys alǵan
ASTANA. QazAqparat - Facebook arqyly kisi óltirý jóninde tapsyrma alǵan 14 jastaǵy jetkinshek ustaldy, dep habarlady meksıkalyq BAQ.
Tómengi Kalıfornııa shtatynyń prokýratýra ókili aıtqandaı, jetkinshek polıtseılerge Tıhýana qalasynda adamdy óltirý úshin oǵan 31 myń peso (1,9 tys. dollar) usynǵanyn aıtty.
Belgilengen ýaqytta jasóspirim esirtki zatyn satýshylar jınalatyn aýdanǵa taksımen kelgen. Oǵan qarý berip, óltiretin adamyn kórsetken.
«Tapsyrysty oryndaǵan» soń bala quqyq qorǵaý organdary qyzmetkerleriniń qolyna túsip, qylmys jasaǵanyn moıyndady.
Tıhýana polıtsııasynyń basshysy Alehandro Lares aıtqandaı, Meksıkanyń krımınaldyq toptary qanisher retinde jetkinshekterdi paıdalanady. Óıtkeni zań boıynsha olardy kóp jylǵa túrmege qamamaıdy.
2010 jyldyń jeltoqsanynda Meksıkada "El Ponchıs" esimdi 14 jastaǵy jasóspirim ustaldy. Ol narkokarteldiń tapsyrysymen 4 adamnyń ómirin qıǵanyn moıyndady.
