Meksıka túrmesinen 11 tutqyn qashty
ASTANA. QazAqparat - Meksıkanyń Kankýn (eldiń ońtústik-shyǵysy) kýrortty qalasy mańynda ornalasqan túrmeden 11 tutqyn qashyp ketken. El Sol de Mexico gazetiniń habarlaýynsha, quqyq qorǵaý organdary qashqan qylmyskerlerdi izdestirý sharalaryn júrgizýde, - deıdi TASS.
Tutqyndar túzeý mekemesindegi qaraýylǵa bas salyp, baılap tastaǵan. Sodan keıin túrme aınalasyna ornatylǵan metall tordy kesip, qorshaýǵa órmelep shyǵyp, ózderin kútip turǵan taksıge minip izderin sýytqan.
Qashqyndar "Los-Sýrenos" bandasynyń quramynda bolǵan. Olardyń qandaı qylmys úshin jazasyn ótegeni áli anyqtalǵan joq.
