Meksıka Tehastyń shekaraǵa qatysty talabyn qabyldamady
ASTANA. KAZINFORM — Meksıka Syrtqy ister mınıstrligi AQSh-tyń Tehas shtaty bıliginiń eki el shekarasyndaǵy Rıo-Bravo ózeninde ornalasqan 9 aralǵa qatysty talabyn qabyldamady. Vedomstvo aımaqtyq bılik organdarynyń sheshimimen memlekettik shekarany ózgertý múmkin emes ekenin málimdedi. Bul týraly Meksıka Syrtqy ister mınıstrliginiń aqparattyq habarlamasynda aıtylǵan, dep jazady TASS.
— Meksıka men AQSh arasyndaǵy shekarany shtat úkimetiniń sheshimimen ózgertýge bolmaıdy. Onyń shegi halyqaralyq shartta belgilengen ólshemderge sáıkes aıqyndalady, — delingen qujatta.
Bul málimdeme Tehas bıliginiń Rıo-Bravo ózeniniń arnasyndaǵy 9 araldy shtattyń jer kadastryna engizý týraly sheshimine baılanysty jasalǵan.
Meksıka Syrtqy ister mınıstrligi 1970 jylǵy Meksıka men AQSh arasyndaǵy shekara týraly shartqa sáıkes, Rıo-Bravo ózenindegi shekara syzyǵy onyń negizgi arnasynyń ortasymen ótetinin atap ótti. Bul qaǵıda ózenniń eki jaǵyndaǵy aýmaqtardyń qaı elge tıesili ekenin, olardyń buryn kimniń ıeliginde bolǵanyna qaramastan, aıqyndaıdy.
Mınıstrliktiń málimetinshe, shart talaptaryn oryndaýǵa jáne ár araldyń qaı memleketke tıesili ekenin anyqtaýǵa eki eldiń úkimeti ýákilettik bergen jalǵyz organ — Halyqaralyq shekara jáne sý komıssııasy. Al shtat deńgeıindegi birde-bir bılik organyna mundaı ókilettik berilmegen.
Sondaı-aq vedomstvo shartqa sáıkes, eki eldiń eshqaısysy komıssııanyń baǵalaýynsha, ózenniń qalypty aǵysyna kedergi keltirýi múmkin qurylystar salýǵa quqyly emes ekenin eske saldy.
Meksıka bıligi shekara mańyndaǵy kez kelgen áreketti jiti baqylap otyratynyn málimdedi. Sonymen qatar ekijaqty kelisimderdi saqtaýǵa jáne belgilengen tetikter arqyly dıalog júrgizýge beıildi ekenin rastady.
Buǵan deıin Tehas shtatynyń Jer basqarmasy bas komıssary Don Bakıngem bastaǵan bılik ókilderi Rıo-Bravo ózeniniń arnasyndaǵy toǵyz aralǵa ıelik etý quqyǵyn jarııalap, olardy shtattyń jer kadastryna engizýdi tapsyrǵan.
Tehas bıliginiń málimdeýinshe, bul araldardy qylmystyq toptar kontrabanda jasaý jáne mıgranttardy shekaradan zańsyz ótkizý úshin paıdalanady. Atalǵan aýmaqtardy shtat menshigi dep taný bılikke ol jerlerge quqyq qorǵaý organdarynyń qyzmetkerleri men Ulttyq ulan sarbazdaryn jiberýge múmkindik bermek bolǵan. Olar araldardaǵy ósimdikterdi tazalap, aýmaqty patrýldep, qorshaý ornatýdy josparlaǵan.
Aıta keteıik, Grýzııa men Ázerbaıjan shekarany belgileý jumysyn jandandyrmaq.
