Meksıka shyǵanaǵyndaǵy apattyń Kaspııdi ıgerý barysynda qaıtalanýyna jol bermeýge nıettimiz - T.Qulybaev
STANA. Qazannyń 5-i. QazAqparat /Marlan Jıembaı/ - Meksıka shyǵanaǵyndaǵy apattyń Kaspııdi ıgerý barysynda qaıtalanýyna jol bermeýge nıettimiz, dedi búgin elordada ótip jatqan «KAZENERGY» 5-shi eýrazııalyq forýmda sóz sóılegen «KAZENERGY» qaýymdastyǵynyń tóraǵasy Tımýr Qulybaev.
Forýmǵa qatysýshylarǵa qarata aıtqan sózinde: «Kaspıı óńiri álemdik energetıkalyq qaýipsizdiktiń mańyzy faktory bolyp tabyldady», dep atap ótken ol elimizde energııanyń balama kózderin damytý qajettigine basa toqtaldy. «Energııa kózderin jetkizý jańa ortalyqtarynyń ǵana róli artyp otyrǵan joq. Sonymen qatar onyń jańa túrleri: atom, taqta tastyq gaz, kún, jel energııasy jáne basqa jańaratyn energııa kózderiniń róli artý ústinde», dedi.
Sondaı-aq búgingi forýmnyń kún tártibinde ekologııa máselesi de erekshe oryn alatyndyǵyn basa aıtqan T.Qulybaev: «Biz Qazaqstanda Meksıka shyǵanaǵyndaǵy apattyń Kaspııdi ıgerý barysynda qaıtalanýyna jol bermeýge nıettimiz jáne búgingi forýmda oǵan sessııa arnalyp otyr», dep túıindedi sózin.
Aıta keteıik, AQSh jaǵalaýyndaǵy munaı apaty 2010 jylǵy sáýirdiń 20-synda tuǵyrdaǵy metan gazynyń jarylýy saldarynan bolǵan edi. Eki kún ótkende tuǵyr sýǵa batyp ketti de, 1,5 shaqyrym tereńdiktegi aqaý paıda bolǵan uńǵydan teńizge munaı quıyldy. Apat aýyzdyqtalǵan ýaqytqa deıin teńizge birneshe mıllıon lıtr munaı tógildi. Bul AQSh tarıhyndaǵy eń úlken apat sanalyp otyr.
