Meksıka shyǵanaǵyndaǵy apatty jaǵdaı Qashaǵanda qaıtalanbaıdy
ASTANA. Maýsymnyń 24-i. QazAqparat /Rýslan Ǵabbasov/ - Meksıka shyǵanaǵynda munaıdyń tógilýi sekildi apatty jaǵdaı Qashaǵanda qaıtalanbaıdy. Bul týraly búgin Astanada «North Caspian Operating Company» (NCOC) kompanııasynyń basqarýshy dırektorynyń orynbasary Jaqyp Marabaev aıtty,
dep habarlaıdy QazAqparat.
«Osy turǵyda naqty aıtarym, biz atalǵan oqıǵadan barynsha sabaq alýǵa tyrystyq. Qazirgi kezde barlyq tıisti sharalar atqaryldy, sondyqtan biz tehnıkalyq qaýipsizdiktiń barlyq talaptaryn eskergenimizdi taǵy bir aıqyndap aldyq. Atap aıtqanda, bizde munaıdyń tógilýine baılanysty qandaı da bir qaýipter men táýekelder týyndap otyrǵan joq»,-dedi ol.
Onyń sózine qaraǵanda, Qashaǵandaǵy bazalar sońǵy býyndy tehnıkamen jabdyqtalyp, barlyq qajetti jabdyqtarmen, kemelermen, sondaı-aq eń bastysy - tıisti daıyndyqtan ótken mamandarmen qamtamasyz etilgen. «Biz osyndaı jumystardy kúsheıtilgen tártipte ótkizgenbiz, ótkizýdemiz jáne de budan ary da jalǵastyratyn bolamyz»,-dedi J. Marabaev.
NCOC kompanııasy Soltústik Kaspıı boıynsha Ónimdi bólisý kelisimi jobasyn iske asyrýda, ıaǵnı álemdegi iri munaı ken orynyn (Qashaǵan ken orny) ıgerý turǵysyndaǵy jumystarmen aınalysady. Jobada Qazaqstannyń úlesi 16,81 paıyzdy quraıdy. Dál osyndaı úles ıtalıandyq «Eni», frantsýzdyq «Total», amerıkandyq «Exxon Mobil» jáne aǵylshyn-gollandııalyq «Shell» kompanııalaryna tıesili. Sondaı-aq japondyq «Inpex» munaı kompanııasynda 7,56 paıyz aktsııa, al «ConocoPhillips» (AQSh) kompanııasynda aktsııa kólemi - 8,40 paıyzdy qurap otyr.
