Meksıka shyǵanaǵynda qaıtadan munaı aǵa bastady
ASTANA. Shildeniń 28-i. QazAqparat - Meksıka shyǵanaǵynda qaıtadan munaı aǵa bastady. Bul joly Lýızıana shtatynyń jaǵalaýyndaǵy býhtalardyń birinde qaıyq aýzy bekitilgen uńǵyǵa soǵylǵan. Abyroı bolǵanda, oqıǵa saldarynan eshkim zardap shekpegen, dep habarlaıdy RTR-Vestı.Ru basylymy.
Dál qazir sý astynan bıiktigi 30 metrge deıin jetetin munaı, gaz jáne laı aralas burqaq urǵylaýda. Osynyń saldarynan apat aýdanynda kemelerdiń qozǵalysy toqtatyldy. Jergilikti ókimet aýqymy jaǵynan bul apaty brıtandyq «Brıtısh Petroleýmnyń» uńǵysynda oryn alǵan tehnogendik apatpen salystyrýǵa kelmeıtinin aıtyp, óńir turǵyndaryn tynyshtandyrýǵa asyǵýda. Jańa apattyń saldarynan kelgen shyǵyn aldaǵy kúnderi anyqtalady.
Al Meksıka shyǵanaǵyndaǵy brıtandyq «Brıtısh Petroleým» kompanııasynyń uńǵysyndaǵy aqqan munaıdy toqtatýǵa jáne apattyń saldaryn joıýǵa jumsalatyn shyǵyny 30 mıllıard dollarǵa jetýi múmkin. Kompanııa ókilderi buǵan deıin, aldyn-ala esepteýler boıynsha, shildeniń 19-yndaǵy jaǵdaı boıynsha kompanııanyń apat aımaǵyndaǵy shyǵyny 4 mıllıard dollardy shamalaǵanyn málim etken bolatyn. Bul somaǵa tógilgen munaıdy jınaýǵa, qosymsha uńǵylar burǵylaýǵa ketken shyǵystar, jaǵalaýdaǵy shtattarǵa tıesili ótemaqylar jáne shaǵym-aryzdardy sotqa jetkizbeı máseleni sheshýge jumsalǵan qarajattar kirgen.
Amerıkandyq Goldman Sachs ınvestıtsııalyq bankiniń baǵalaýynsha, VR kompanııasynyń apattyń saldaryn joıý jáne ótemaqylardy tóleý jónindegi barlyq shyǵyny 70 mıllıard dollarǵa jetýi múmkin.
