Meksıka prezıdenti esirtki kartelderine qarsy AQSh-pen birlesken operatsııany joqqa shyǵardy

ASTANA. KAZINFORM – Meksıka prezıdenti Klaýdııa Sheınbaým seısenbi kúni óz úkimetiniń AQSh-tyń Esirtkimen kúres basqarmasymen (EKB) esirtki kartelderine qarsy birlesken operatsııany bastaý týraly keliskenin joqqa shyǵardy, dep habarlaıdy Sınhýa.

- Esirtkimen kúres basqarmasymen eshqandaı da kelisim joq. Olar málimdeme jarııalapty, al biz olardyń nege súıengenin bilmeımiz. Biz de, Meksıkanyń ózge de qyzmetteri esirtkimen kúres basqarmasymen kelisim jasaǵan joq, - dep málimdedi prezıdent tańǵy baspasóz máslıhatynda.

- Osy rette túsindire ketý kerek, kez kelgen birlesken áreket birlesken túrde júzege asyrylady. Biz AQSh úkimeti agenttigi tarapynan jarııalanǵan aqparatty Meksıka úkimetimen keńespeı turyp, rastamaımyz, dedi Meksıka basshysy.

K.Sheınbaým sonymen qatar eki el úkimetiniń birneshe aıdan beri Meksıkanyń Syrtqy ister mınıstrliginiń úılestirýmen qaýipsizdik kelisimi boıynsha jumys istep jatqanyn jetkizdi.

Onyń sózinshe, kelisimge jaqyn arada qol qoıylady. Onyń negizinde egemendik, ózara senim, aýmaqtyq qurmet, bireýge baǵynbastan úılestirý sııaqty máseleler jatyr, dep qosty Meksıka prezıdenti.

Osyǵan deıin AQSh-tyń esirtki kartelderimen kúreske 4 myń teńiz jaıaý áskerin jiberetini týraly jazdyq.