Meksıka prezıdenti AQSh-qa Amerıka Mexicana degen jańa ataýdy usyndy

ASTANA. KAZINFORM – Meksıka prezıdenti Klaýdıa Sheınbaým AQSh-tyń saılanǵan prezıdentiniń Meksıka shyǵanaǵynyń atyn ózgertý týraly pikirine jaýap retinde AQSh-tyń XVII ǵasyrdaǵy ataýyn qoldanýdy usyndy, dep habarlaıdy Kazinform menshikti tilshisi.

Donald Tramp seısenbide Meksıka shyǵanaǵynyń ataýyn Amerıka shyǵanaǵy dep ózgertýge nıetti ekenin málimdedi.

Óz kezeginde, Meksıka prezıdenti Klaýdııa Sheınbaým AQSh, Meksıka jáne Kanadanyń keıbir bólikteri kórsetilgen 1607 jylǵy kartany usyndy. Ol Donald Tramptyń Meksıka shyǵanaǵynyń ataýyn ózgertý týraly usynysyna jaýap retinde AQSh-qa aýmaqtyń tarıhı ataýyn «Amerıkana Meksıkana» dep qaıtarýdy usyndy, dep habarlaıdy NBC News.

- America Mexicana dep nege atamasqa? Jaqsy estiledi, solaı emes pe? Bul ras emes pe? — dep habarlady Klaýdııa Sheınbaým.

1607 jyly Amsterdamda ornalasqan Gollandııalyq Ost-Ind kompanııasyna tapsyrys bergen eýropalyq kartada bul aýmaq «America Mexicana» dep ataldy.

Bul ataý ıspan bıligine qarsy táýelsizdik qozǵalysy kezinde ázirlengen Apatsıngan Konstıtýtsııasynda (Meksıkandyq Amerıkanyń 1814 jylǵy bostandyq jarlyǵy) da bar.

Klaýdııa Sheınbaým sondaı-aq Donald Tramptyń eldi esirtki kartelderi basqarady degen pikirin joqqa shyǵaryp, «Meksıkany halyq basqarady» dep jaýap berdi.

Osyǵan deıin Tramptyń Qytaı, Meksıka jáne Kanada taýarlaryna jańa tarıf engizýdi josparlap otyrǵanyn jazdyq.