Meksıka chempıonatynda match kezinde jappaı tóbeles bolyp, 17 jankúıer qaza tapty
NUR-SULTAN. QazAqparat - Meksıkalyq jankúıerler jergilikti birinshiliktiń matchy kezinde jappaı tóbeles shyǵardy, dep habarlaıdy QazAqparat.
Oqıǵa 6 naýryz, jeksenbige qaraǵan túni boldy, dep jazdy jýrnalıst Devıd Medrano Twitter -de. Ol sondaı-aq 17 adamnyń qaza tapqanyn habarlady.
«Keretaro» óz alańynda 60-mınýtta 0:1 esebimen jeńilip jatqanda, trıbýnada tóbeles bastalǵan. «Keretaro» jankúıerleri alańǵa júgirip shyǵyp, VAR jabdyǵyn (tóreshilerge kómek kórsetý júıesi) qıratty. Atlas jankúıerlerimen aradaǵy tóbeleste 17 mert boldy, kópshiligi Atlastyń jankúıerleri.
Keretaro shtaty polıtsııasynyń ókili kóz jumǵandardyń barlyǵy er adamdar ekenin aıtty. Stadıon kúzetshileri kórermenderge, sonyń ishinde áıelder men balalarǵa trıbýnadan shyǵýǵa múmkindik berý úshin qosymsha esikterdi ashty.
Buǵan deıin Keretaro shtatynyń polıtsııasy 22 adamnyń jaralanyp, ekeýi aýyr jaǵdaıda aýrýhanaǵa jatqyzylǵanyn málim etken.
Meksıka chempıonatynyń «Keretaro» - «Atlas» oıyny qaýipsizdikke baılanysty qaıta jalǵasqan joq. Kezdesý basqa kúnge aýystyrylady.
