Meksıka bıligi myńdaǵan muǵalimderdi jumystan shyǵarýda
ASTANA. QazAqparat - Seısenbi kúni Meksıkada mindetti kásibı attestattaýǵa qatyspaǵan 3,4 myńǵa jýyq muǵalim jumystan shyǵarylady, dep habarlady latynamerıkalyq eldiń bilim mınıstri Aýrelıo Nýno.
Onyń aıtýynsha, Meksıkadaǵy 134 myń bilim qyzmetkeriniń ishinen taǵy 15,3 paıyzy attestattaýda qanaǵattanarlyqsyz nátıjeler kórsetip, synaqtan óte almady. Jumystan shyǵarylǵandarǵa qaraǵanda, bul muǵalimderge synaqtan bir jyl ishinde ótýge taǵy bir múmkindik beriledi.
Jalpy alǵanda, attestattaý testilerin muǵalimderdiń 36,2 paıyzy «qanaǵattanarlyq», 40,5 paıyzy - «jaqsyǵa» tapsyrsa, «óte jaqsy» baǵasyn nebári 8 paıyzy alǵan.
Meksıkalyq muǵalimder men olardyń kásipodaqtary sońǵy jyldary úkimetke qarsy túrli aktsııalarǵa qatysatyn qýatty kúshke aınaldy. Muǵalimder (Meksıkada muǵalimderiniń jartysyna jýyǵy - er adamdar) aımaqtarda bılik organdarynyń ǵımarattaryn talaı ret basyp alyp, Mehıkoda kóp myń adam qatysqan sherýlerge shyqty jáne el astanasynyń áýejaıynyń jumysyn toqtatyp qoıǵan.
Olardyń narazylyǵynyń basty maqsaty prezıdent Enrıke Penıa Netonyń bilim berý salasynda jumys isteý quqyq normalaryn qatańdatýdy kózdep otyrǵan reformasy boldy.
