Meksıka bıligi 2006 jyly úıindi astynda qalǵan 65 kenshiniń denesin shyǵarmaq
NUR-SULTAN. QazAqparat - Meksıka bıligi taıaý ýaqytta 2006 jyly Koaýıla shtaty "Pasta-de-Konchos" kómir shahtasyndaǵy jarylys saldarynan úıindi astynda qalǵan 65 kenshiniń denesin shyǵarý operatsııasyn bastaıdy. Bul týraly sársenbide Meksıka prezıdenti Andres Manýel Lopes Obrador málimdedi.
«Biraz ýaqyt buryn bergen ýáde men ádildikti qalpyna keltirý týraly aıtyp otyrmyn», - degen memleket basshysynyń sózin keltiredi Milenio gazeti.
Lopes Obrador bıliktiń qajetti jumystardy júrgizý úshin aıtarlyqtaı qarjy kólemin bólgenin atap ótti. Túrli derekter boıynsha, kenshilerdiń deneleri 150-490 metr tereńdikte qalyp qoıǵan.
"Pasta-de-Konchos" jarylysy 2006 jyldyń 19 aqpanynda tańerteń boldy. Qutqarý operatsııasynan esh nátıje shyqpady. Aqpan aıynyń sońynda osy shahta tıesili kompanııanyń basshylyǵy qapasta qalyp qoıǵan kenshilerdiń tiri qalýy múmkin emestigin málimdedi. Osydan keıin bul kásiporynda kómir óndirý isin toqtatý týraly sheshim qabyldandy.
