Meksıka bıligi qatygez vıdeoıyndarǵa salyq engizýdi josparlap otyr
ASTANA. KAZINFORM — Meksıka bıligi qatygez vıdeoıyndarǵa salyq engizýdi josparlap otyr. Bul salyq 2026 jylǵa arnalǵan bıýdjettik jobasyna qosyldy. Jınalǵan qarajat vıdeoıyndardy shamadan tys oınaýdan týyndaıtyn densaýlyq buzylystaryn emdeýge jumsalady, dep jazady AZERTADJ.
Agenttik habarlaǵandaı, úkimettiń baǵalaýynsha, kelesi jyly bul shara shamamen 10 mıllıon dollar tabys ákelýi múmkin.
Meksıka úkimeti densaýlyq saqtaý saıasaty aıasynda qatygez vıdeoıyndarǵa salyq salýdy josparlap otyr. Bul týraly seısenbi kúni Qarjy mınıstrligi habarlady. Bul shara 2026 jylǵa arnalǵan bıýdjet jobasyna engizilgen jáne ol temeki men tátti sýsyndarǵa arnaıy salyq salýmen qatar júredi, dedi mınıstr Edgar Amador.
— Jańa salyqtar «salyq saıasaty emes, densaýlyq saqtaý jáne qaýipsizdik saıasatynyń bóligi sanalady, — dedi ol baspasóz konferentsııasynda.
Qarjy mınıstrligi salyqqa túsetin vıdeoıyndardyń naqty krıterıılerin atap ótpedi, biraq salyq mólsheri 8% bolatynyn habarlady. Bul 2026 jyly 183 mıllıon peso (shamamen 9,8 mıllıon dollar) jınaýǵa múmkindik beredi dep kútiledi.
— Sońǵy zertteýlerge sáıkes, qatygez vıdeoıyndardy qoldaný men jasóspirimder arasyndaǵy agressııa deńgeıiniń joǵarylaýy, sondaı-aq oqshaýlaný men mazasyzdyq sııaqty áleýmettik jáne psıhologııalyq teris áserlerdiń arasynda baılanys bar, — dep atap ótti mınıstrlik bıýdjettik jobasynda.
Qarjy vıtse-mınıstri Karlos Lermanyń sózinshe, bul patologııalar adamdardy «onyń ekonomıkalyq áleýetiniń óte erte satysynda» zaqymdap, olardyń damýyna kedergi keltiredi jáne densaýlyq saqtaý júıelerine «mańyzdy júkteme» týyndatady.
Bıýdjet jobasy 15 qarashaǵa deıin Kongreste talqylanyp, bekitilýi tıis.
Osydan buryn Meksıkada júk poıyzy joldy kesip ótpek bolǵan eki qabatty jolaýshylar avtobýsymen soqtyǵysqany anyqtaldy. Saldarynan 10 adam qaza taýyp, 61 adam túrli dárejede jaraqat aldy.