Meksıka bazarynda qýatty jarylys boldy: 27 adam ajal qushty
ASTANA. QazAqparat - 20 jeltoqsan kúni Meksıkada otshashýlar satylatyn bazarda iri jarylys boldy, kem degende 27 adam qaza boldy, dep habarlaıdy QazAqparat TASS agenttigine silteme jasap.
La Jornada gazetiniń elektrondy nusqasy azamattyq qorǵanys kúshterine silteme jasap habarlaýynsha, oqıǵa kóptegen pırotehnıkalyq sheberhanalar ornalasqan Mehıko shtaty Týltepek mýnıtsıpalıtetinde oryn aldy.
Federaldy polıtsııa qyzmeti buǵan deıin oqıǵa ornynda kem degende 9 adam mert bolyp, 70-i zardap shekkendigi týraly aıtqan edi.
Meksıka prezıdenti Enrıke Penıa Neto marqumdardyń otbasylaryna kóńil aıtyp, jaraqattanǵan adamdarǵa tezirek saýyǵyp ketýdi tiledi. Sondaı-aq federaldy úkimet jarylys barysynda zardap shekkenderge kómek kórsetetinin aıtty.
Oqıǵanyń oryn alý sebepteri ázirge belgisiz. Jarylys ornynda ondaǵan dáriger, qutqarýshylar men órt sóndirýshiler jumys isteýde.
Týltepek Mehıko shtatyndaǵy pırotehnıka shyǵaratyn basty ortalyq bolyp sanalady. Aǵymdaǵy jyldyń qazan aıynda osy aýdandaǵy sheberhanalardyń birinde bolǵan jarylys saldarynan bir adam ajal qushyp, taǵy ekeýi zardap shekken bolatyn. Sáýir men naýryz aılarynda bolǵan osyndaı oqıǵalardan keıin kem degende bes adam kóz jumyp, taǵy birnesheýi, sonyń ishinde balalar jaraqattanǵan edi.
