Meksıka áskeri Halısko shtatynda kartel jetekshisi El-Menchony óltirdi

ASTANA. KAZINFORM – Meksıka áskeri Halısko Jańa urpaq karteliniń jetekshisi, El-Mencho degen atpen belgili Nemesıo Osegýera Servantesti óltirdi, dep habarlaıdy Kazinform DW basylymyna silteme jasap.

Assoshıeıted Press agenttiginiń aty atalmaǵan federaldy sheneýnikke silteme jasap habarlaýynsha, bul – Meksıkanyń eń qýatty karteline soqqy jáne bıliktiń AQSh prezıdenti Trampqa esirtki saýdasymen kúrestegi eń úlken tabysy.

Vashıngtondaǵy Meksıka elshiligi áskerı operatsııaǵa qatysty qosymsha aqparatty AQSh bergenin aıtty.

Sheneýniktiń cózinshe, operatsııa AQSh-qa fentanıl men kokaın tasymaldaıtyn kartel ornalasqan Meksıkanyń batysyndaǵy Halısko shtatynda bolǵan. Bul aımaqta jappaı tártipsizdikterge, sonyń ishinde joldar men kólikterdiń órtenýine ákeldi. Áleýmettik jelilerde Halıskodaǵy Pýerto-Valıarta týrıstik qalashyǵynyń ústinen tútinniń burqasyndary, sondaı-aq shtat astanasy Gvadalahara áýejaıy arqyly úreılenip ketken adamdardyń vıdeolary taratyldy.

AQSh Memlekettik departamenti buǵan deıin El Menchonyń tutqyndalýyna sebepshi bolǵan aqparat úshin 15 mıllıon dollarǵa deıin syıaqy usynǵan. Kartel 2009 jyly qurylǵan jáne AQSh Ádilet mınıstrliginiń málimeti boıynsha, Meksıkadaǵy eń qatygez qylmystyq uıymdardyń birine aınaldy.

AQSh Memlekettik hatshysynyń orynbasary Krıstofer Landaý El Menchonyń ólimin «Meksıka, AQSh, Latyn Amerıkasy jáne álem úshin úlken oqıǵa» dep atady. Sonymen birge, Memlekettik departament Jalısko, Tamaýlıpas, Mıchoakan, Gerrero jáne Nýevo-Leon shtattaryndaǵy amerıkalyq azamattardy jalǵasyp jatqan áskerı operatsııalarǵa baılanysty qaýipsiz jerlerde qalýǵa shaqyrdy. 

Osyǵan deıin Tramp Kolýmbııa, Meksıka jáne Kýbaǵa eskertý jasaǵanyn jazǵan edik.