Meksıka álem chempıonaty aldynda Ebolaǵa qarsy áreketti kúsheıtedi
ASTANA. KAZINFORM — Meksıka úkimeti Afrıka qurlyǵynda Ebola bezgeginiń órshýine baılanysty epıdemıologııalyq baqylaýdy kúsheıtip, profılaktıkalyq sharalardy keńeıtý týraly sheshim qabyldady, dep habarlaıdy Report.
— Biz, eń aldymen, álem chempıonatynyń ótýin eskere otyryp, AQSh jáne Kanadamen tyǵyz ózara is-qımyl aıasynda epıdemıologııalyq monıtorıng hattamalaryn iske qosyp jatyrmyz», — dedi Densaýlyq saqtaý mınıstrliginiń basshysy Davıd Kershenobıch.
Vedomstvo basshysy atap ótkendeı, el aýmaǵynda osy ýaqytqa deıin birde-bir juqtyrý jaǵdaıy tirkelmegen, al vırýstyń elge ený yqtımaldyǵy «óte tómen» dep baǵalanyp otyr.
Budan bólek, Meksıka tarapy áýejaılarda sanıtarlyq súzgiler uıymdastyryp, kelgen jolaýshylardyń qujattary men baǵyttaryn tekserýdi josparlap otyr. Bul sharalar Eýropa jáne ózge de óńirler arqyly tranzıttik reıstermen ushatyn jolaýshylarǵa da qatysty bolady. Áýe tasymaldaýshylarymen birlesip, ushaq bortyna otyrǵyzǵanǵa deıin qaýip faktorlaryna baqylaýdy kúsheıtý kózdelgen.
Dúnıejúzilik densaýlyq saqtaý uıymy 17 mamyrda Kongo Demokratııalyq Respýblıkasynda jáne Ýgandada Ebola indetiniń órshýin halyqaralyq mańyzy bar qoǵamdyq densaýlyq saqtaý salasyndaǵy tótenshe jaǵdaı dep tanydy.
Aıta keteıik, Afrıka odaǵy densaýlyq saqtaý organdary Ebola vırýsynyń taralý qaýpi óńirdegi keminde on el úshin saqtalyp otyrǵanyn eskertti.
