Meksıka AQSh-pen shekarasyn jabýǵa nıet bildirmedi
ASTANA.KAZINFORM — AQSh-tyń jańadan saılanǵan prezıdenti Donald Tramp Meksıkadan ákelinetin barlyq taýarlarǵa 25 paıyzdyq baj salyǵy engiziletini jarııalanǵannan keıin, eki kún ótken soń Meksıka prezıdenti Klaýdııa Sheınbaýmmen telefon arqyly sóılesti, dep jazady ABC News.
Donald Tramp óziniń Truth Social paraqshasynda telefon arqyly sóılesýdi «óte nátıjeli» dep baǵalap, shekaradaǵy baqylaýdy jáne esirtki aǵynymen kúresý joldaryn talqylaǵanyn aıtty.
Tramptyń aıtýynsha, Meksıka prezıdenti «Ońtústik shekarany jaba otyryp, Meksıka arqyly AQSh-qa kóshi-qondy toqtatýǵa kelisti».
Óz kezeginde Meksıka basshysy shekarany jabýdy josparlamaǵanyn atap ótti.
— Donald Tramppen áńgime tamasha órbidi. Áńgimemizde men oǵan Meksıkanyń adam quqyqtaryn saqtaı otyryp, kóshi-qon máselesin sheshýge baǵyttalǵan keshendi strategııasyn túsindirdim. Bul mıgranttarǵa shekaraǵa jetkenge deıin kómektesýdi qamtamasyz etedi. Biz Meksıkanyń ustanymy shekaralardy jabý emes, úkimetter men halyqtar arasynda kópir salý ekenin qaıtalap aıtamyz, — dedi Klaýdııa Sheınbaým.
Bul qońyraý osy aptada Donald Tramp AQSh-qa zańsyz kóshi-qon men esirtki aǵynyn toqtatý maqsatynda Meksıkaǵa, sondaı-aq Kanada men Qytaıǵa baj salyǵyn engizý josparyn jarııalaǵannan keıin jasaldy.