Meksıka 2030 jylǵa deıin jumys aptasyn jyl saıyn eki saǵatqa qysqartpaq

ASTANA. KAZINFORM — Meksıkanyń Depýtattar palatasy jumys aptasyn 48 saǵattan 40 saǵatqa deıin kezeń-kezeńimen qysqartý týraly zań jobasyn maquldady. Negizgi erejelerdi 500 depýtattyń 469-y qoldap, qarsy daýys bergender bolǵan joq. Daýys berý shamamen on saǵatqa sozylǵan pikirtalastan keıin ótken. Bul týraly Al Jazeera jazdy.

Reforma kelesi jyldan bastap kúshine enedi. Qujatqa sáıkes, jumys ýaqyty 2030 jylǵa deıin jyl saıyn eki saǵatqa qysqartylyp otyrady. Sarapshylardyń baǵalaýynsha, bul ózgeris shamamen 13,4 mıllıon qyzmetkerge áser etedi. Bastamany ótken jyldyń jeltoqsan aıynda el prezıdenti Klaýdıa Sheınbaým usynǵan. Zańnyń qabyldanýy bıznes ókilderimen birneshe jylǵa sozylǵan kelissózderdiń nátıjesi boldy.

Sonymen qatar reformada mańyzdy eskertý bar: zań eń tómengi demalys kúnderiniń sanyn qysqartpaıdy jáne sonymen birge ruqsat etiletin ústeme jumys saǵattarynyń shegin keńeıtedi. Synshylar mundaı ózgerister is júzinde jumys aptasyn qysqartýdyń áserin álsiretýi múmkin dep alańdaýshylyq bildirip otyr.

— Ónimdilik degenimiz — tıtyqtap jumys isteý emes, bul — qadir-qasıetti saqtaı otyryp eńbek etý, — dedi bılik partııasy Morena-nyń ókili jáne Meksıka jumysshylary men qyzmetkerleriniń avtonomdy konfederatsııasynyń bas hatshysy Pedro Ases.

Reforma Meksıkanyń eńbek naryǵyndaǵy birqatar ózekti máselelerdi de aıqyndap berdi. El Ekonomıkalyq yntymaqtastyq jáne damý uıymyna (EYDU) múshe 38 memleket arasynda eńbek ónimdiligi men jalaqy deńgeıi boıynsha sońǵy orynda tur. Ortasha eseppen meksıkalyq jumysshy jylyna 2 226 saǵattan astam eńbek etedi — bul uıymdaǵy jumys pen jeke ómir teńgerimi kórsetkishteri boıynsha eń tómen nátıjelerdiń biri. Sonymen qatar, jumyspen qamtylǵandardyń shamamen 55 paıyzy beıresmı sektorda jumys isteıdi jáne eńbek kepildikteriniń kópshiliginen aıyrylǵan.

Oppozıtsııa ókilderiniń bir bóligi zań jobasyn kúmánmen qabyldady.

— Reforma ıdeıasy jaman emes, alaıda áli de tolyqtyrýdy qajet etedi jáne asyǵys qabyldandy, — dedi PRI partııasynan depýtat Aleks Domınges.

Qujattyń tolyq kúshine enýi úshin ony shtattardyń zań shyǵarýshy jınalystarynyń úshten ekisi maquldaýy qajet.

Aıta keterligi, kórshi Argentına kerisinshe baǵytty tańdady. El prezıdenti Haver Mıleı jumys kúnin segiz saǵattan on eki saǵatqa deıin uzartýdy jáne ústeme eńbekaqy tóleýdi shekteýdi kózdeıtin zań jobasyn qoldady. Qujatty Kongrestiń tómengi palatasy maquldady, al Senattyń sońǵy sheshimi aldaǵy kúnderi belgili bolady.

Aıta keteıik, Prezıdent Klaýdııa Sheınbaým jýrnalıster suraǵyna jaýap berip jatqan sátte magnıtýdasy 6,5 balǵa jetken jer silkinisi bolǵan edi. Terbelis zaldy shaıqap, jer silkinisi týraly eskertý júıesi iske qosylǵan kezde ǵana baryp baspasóz máslıhatyn toqtatqan bolatyn.