Mekkege jaıaý attanǵan Astana turǵyny Atyraýǵa jetti
ASTANA. QazAqparat - Mekkege jaıaý jolǵa shyqqan 47 jastaǵy astanalyq Dýlat Imanqajy Atyraýǵa jetti, dep jazady «Aq Jaıyq» gazeti.
Basylymnyń jazýynsha, ol 6 shilde kúni elorda kúninde jolǵa shyǵyp, 25 shildede munaıly astanaǵa aıaq basqan. «Birde Din ister agenttiginiń tóraǵasy Marat Ázilhanovpen tanysqan edim. Ol meniń mundaı tekke ıe bola otyryp, Mekkege áli barmaǵanyma tańdanys bildirdi. Birshama ýaqyt ótkennen keıin ol maǵan Mekkege barýǵa usynys jasady. Maǵan bul ıdeıa unady. Meniń arǵy ata-babalarym 19 ǵasyrda dál osylaı jaıaý qajylyqqa barǵan eken», - dedi D.Imanqajy.
Mekkege jaıaý attanǵan azamatqa ózi kúzetshi bolyp jumys isteıtin elordadaǵy emhana men «Nur Astana» meshiti azdaý bolsa da qarjylaı kómek kórsetken. Al depýtattardyń biri júrgizýshimen jeke kóligin D.Imanqajyǵa Astanadan Atyraýǵa deıin ilestirip jibergen.
«Ádette, tańǵy 8-den keshki 8-ge deıin kúni boıy júgiremin. Ortasha eseppen kúnine 60 shaqyrym júgirýdi josparlaǵan edim. Alaıda ýaqytym tym az, men 15 qyrkúıekte Mekkede bolýǵa tıistimin. Óıtkeni, dál osy merzimde Saýd Arabııasyna qajylyqqa keletin adamdar leginiń artýyna baılanysty shekarany jabady. Sondyqtan da kúnine 100 shaqyrymǵa deıingi qashyqtyqty eńserýge tyrysamyn», - dedi ol.
Qajylyqqa attanǵan D.Imanqajy Qazaqstan, Ázerbaıjan, Iran, Kýveıt, Saýd Arabııasy elderi arqyly 7,5 myń shaqyrym jol júrip ótetin bolady.
