Mekkedegi jol-kólik apaty saldarynan qajylyqqa barǵan Qazaqstannyń 4 azamaty jeńil jaraqattar aldy-QR SІM
ASTANA. 29 qazan. QazAqparat - Mekkede bolǵan jol-kólik apaty saldarynan qajylyqqa barǵan Qazaqstannyń 4 azamaty jeńil jaraqattar aldy. Bul týraly búgin Astanada ótken dástúrli brıfıngte QR Syrtqy ister mınıstrliginiń resmı ókili Altaı Ábıbýllaev málim etti.
24 qazan kúni Qajylyq rásimderin jasaýdyń birinshi kúni bastalǵan bolatyn. Resmı ókildiń aıtýynsha, aǵymdaǵy jyly Qajylyqqa 5,5 myń qazaqstandyqqa kvota bólingen bolatyn. Qajylyq basyna 5246 adam keldi. QR Djıddadaǵy Konsýldyǵy men Er-Rııadtaǵy Elshiligi tarapynan Qajylar men qazaqstandyq Qajy-mıssııasyna barlyq qajetti kómekter kórsetilýde. Atap aıtqanda, úlken Qajylyq toptardyń kelýin anyqtaý men Djıdda qalasyndaǵy áýejaıda kútip alý, sonymen qosa olardyń ári qaraı turatyn oryndaryna tasymaldaýdy baqylaý júzege asyryldy. Óz toptarynan qalyp qoıǵan nemese joǵalyp qalǵan qazaqstandyqtarǵa jedel kómek kórsetý de sátti oryndalýda.
«Sonymen qatar, óte kóp adam shoǵyrlanýyna baılanysty, Qajylyq barysynda fors-majorlyq jaǵdaılar oryn alýy ábden múmkin. Osylaısha, 22 qazan kúni Mekkede bolǵan jol-kólik apaty saldarynan qajylyqqa kelgen Qazaqstannyń 4 azamaty jeńil jaraqattar alǵanyn habarlaımyz. Biraq, olar medıtsınalyq tekserý men kómekten keıin óz qajylyqtaryn qaıta jalǵastyrdy»,-dedi A. Ábıbýllaev.
Osyǵan baılanysty, Qajylyq-mıssııalar men Qazaqstannyń týrıstik kompanııalarynyń jetekshilerimen birlese otyryp kúni-túni tıisti monıtorıng júzege asyrylýda.
