Mekkedegi Saǵat munarasy murajaıynda qazaq tilindegi aýdıogıd paıda bolady
ASTANA. KAZINFORM — Qazaqstan azamattary úshin murajaıǵa kirýge arnaıy jeńildikter de qarastyrylyp jatyr, dep habarlaıdy Syrtqy ister mınıstrliginiń baspasóz qyzmeti.
Qazaqstannnyń Jıdda qalasyndaǵy Bas konsýly Rýslan Qospanov Mekke qalasyndaǵy «Saǵat munarasy murajaıynyń» basshylyǵymen kezdesti.
Kezdesý barysynda qazaqstandyq dıplomat pen murajaıdyń Bas dırektory Naıf ál-Malıkı týrızm, ǵylym jáne mádenıet salalarynda birlesken jobalar men bastamalardy iske asyrýdyń yqtımal baǵyttary men tetikterin talqylady.
— Alǵashqy qadam retinde taraptar Qazaqstan azamattary úshin murajaıǵa kirýge arnaıy jeńildikter qarastyrý týraly kelisimge qol jetkizdi. Sonymen qatar, Qazaqstannan keletin resmı delegatsııalar úshin erekshe sharttar engizilmek jáne murajaıdyń portatıvti aýdıogıd júıesine qazaq tilin qosý boıynsha jumys bastalatyn bolady. Kezdesý qorytyndysy boıynsha taraptar turaqty baılanys ornatyp, qol jetkizilgen ýaǵdalastyqtardy resmı túrde bekitý maqsatynda tıisti qujattardy daıyndaýǵa kelisti, — delingen habarlamada.
Mekkedegi Saǵat ǵımaraty murajaıy (The Clock Tower Museum in Makkah) — qasıetti ál-Haram meshitine qarama-qarsy turǵan Abraj ál-Baıt munaralary kesheniniń joǵarǵy qabattarynda ornalasqan. Murajaı Korol Ábdelazız atyndaǵy Ǵylymı jáne astronomııalyq zertteýler ınstıtýtynyń qamqorlyǵymen qurylǵan jáne ýaqyt, astronomııa men ıslam kúntizbesi taqyryptaryna arnalǵan.
Saǵat munarasy birneshe erekshe sıpattaryna baılanysty Gınnestiń rekordtar kitabyna engen:
- Jer sharyndaǵy eń bıik munaralardyń biri — shamamen 601 metr bıiktiktegi bul ǵımarat álemdegi úshinshi eń bıik qurylys bolyp sanalady (Dýbaıdaǵy Býrdj-Halıfa men Japonııadaǵy Tokyo Skytree munarasynan keıin, shpıl bıiktigi boıynsha).
- Álemdegi eń bıik aı tańbasy — munaranyń shyńynda ornatylǵan altyn aıdyń bıiktigi shamamen 23 metr, salmaǵy 35 tonnadan asady jáne ol 30 shaqyrym qashyqtyqtan kórinetin lazerli projektorlarmen jaryqtandyrylady.
Osyǵan deıin Saýd Arabııasy Mekkede aýqymdy megajobany iske qosqany belgili boldy.