Mekkede úlken qajylyq bastaldy
ASTANA. QazAqparat - Búgin Mekkede úlken qajylyq bastaldy. Tańerteńnen beri qajylar qasıetti Mına jazyǵyna aǵylyp jatyr.
Bes paryzdyń biri qajylyqty oryndaýǵa kelgen 2-mln. adamnyń arasynda úsh myń otandastarymyzda bar, dep jazady muslim.kz.
Bul kúnderi qajylar tazalyq pen adamdar arasyndaǵy tepe-teńdikti bildiretin "ıhram" kıip, qulshylyq jasaıdy.
"Men otandastarymmen birge qasıetti Mekkeden 10 shaqyrym jerdegi Mına jazyǵyna kelip ornalastym. Bul jerde bes ýaqyt namazymdy oqyp, otbasymnyń amandyǵyn, elimizdiń tynyshtyǵyn tilep duǵa jasaımyn. Al, erteń Arapat taýyna qaraı attanamyz", - deıdi Qazaqstannan barǵan qajylardyń biri Manat Eshbaı.
QMDB Qajylyq Mıssııasy Mına jazyǵynda Qazaqstan qajylarynyń qaýipsizdik sharalaryn qadaǵalaýda.
Qazaqstan Qajylyq Mıssııasy ýaǵyz-nasıhat bóliminiń jetekshisi Baýyrjan Álıuly qajylyq fırmalaryn aralap, jerlesterimizge ýaǵyz aıtýda.
Bekitilgen ýaǵyz taqyryptaryna sáıkes, arapa kúniniń artyqshylyǵy, Mınada duǵa jasaýdyń mańyzdylyǵy týraly nasıhattar júrgizilýde.
Sonymen qatar, shatyrlarda dárigerler ortalyǵy ornastyryldy. «Qajylyq mıssııasynyń quramyndaǵy dárigerler medıtsınalyq qyzmet kórsetýge daıyn. Jedel járdem kóligimende qamtamasyz etilgen. Qazir qatty naýqastanǵan adam tirkelmedi», - dep atap ótti dárigerler tobynyń jetekshisi Rýslan Іzdibaev.
Aıta keteıik, qajylar Mına jazyǵynda bir tún ótkizip, tańerteń Arapat taýyna kóteriledi.
