Mekkede qulaǵan kótergish-kran ıesi Ben Laden kompanııalaryna sanktsııa salyndy
ASTANA. QazAqparat - Saýd Arabııasynyń bıligi Ýsama ben Ladenniń ákesi sheıh Mohammed bın Laden negizin qalaǵan Saudi Binladin Group qurylys kompanııasyna qatysty tergeý júrgizedi, dep habarlady «VVS» agenttigi.
Bul sheshim Mekkedegi Al-Haram meshitindegi kótergish-krannyń qulaýyna baılanysty shyǵaryldy. Oqıǵa saldarynan 100-den astam adam qaza tapty. Álemdegi basty jáne eń iri meshitti qaıta jańartý, keńeıtý jumystaryn Saudi Binladin Group kompanııasy júrgizgeni týraly buǵan deıin habarlanǵan bolatyn. Jergilikti BAQ-qa súıensek, Saýd Arabııasynyń Koroldik soty seısenbide kompanııaǵa tergeý aıaqtalǵanǵa deıin jańa kelisimsharttarǵa qol qoıýǵa tyıym saldy. Budan basqa, sot eldiń qarjy mınıstrligine kompanııanyń barlyq jobalaryna aýdıt júrgizýge nusqama berip, Ben Laden áýletiniń keı múshelerinen elden syrtqa shyqpaý týraly qolhat aldy. Sondaı-aq, sot zardap shekken otbasylarǵa 1 mıllıon rıal (270 myń dollarǵa jýyq) ótemaqy tóleýge qaýly etti.
