Mekkede Qazaqstannan qajylyqqa kelgenderdiń qatysýymen salaýatty kesh ótkizildi
ASTANA. 13 qarasha. QazAqparat - Qurban aıttyń qarsańynda qasıetti Mekkede Qazaqstannyń Saýd Arabııasyndaǵy Elshiligi Qazaqstannan qajylyqqa kelgenderdiń qatysýymen salaýatty kesh ótkizdi.
Qazaqstannyń Rııadtaǵy Elshiliginiń málimetinshe, Elshi Qaırat Lama Sharıf qajylyq paryzyn oryndaý úshin Qazaqstannyń túkpir-túkpirinen kelgen musylmandar aldynda sóz sóılep, Qazaqstan men Saýd Arabııasy arasyndaǵy yntymaqtastyqtyń jetistikteri týraly baıandap berdi. Qazaqstannyń Islam konferentsııasy uıymy janyndaǵy Turaqty ókili Baqyt Batyrshaev óz kezeginde jınalǵan qaýymǵa 2011 jyly Qazaqstannyń musylman álemindegi osy eń bedeldi uıymǵa tóraǵalyq etýiniń maqsat-múddelerimen tanystyrdy.
QR Mádenıet mınıstrligi Din isteri komıteti tóraǵasynyń orynbasary Janbolat Muhametqalıev osy kúnderi 3,5 myńnan astam qajylarǵa qyzmet kórsetip jatqan qajylyq mıssııasynyń is-sharalaryn sóz etti. Qazaqstan musylmandary Dinı basqarmasynyń Qajylyq bóliminiń meńgerýshisi Álisher Spanov qazaqstandyq qajylarǵa Bas múftı Ábsattar qajy Derbisáliniń duǵaı sálemin, elge aman-esen oralýlaryn Alla taǵaladan tilegen duǵasyn jetkizdi.
Islam mádenıeti men bilimin qoldaý qorynyń atqarýshy dırektory Balǵabek Myrzaev qazaq jáne orys tilderinde jaryqqa shyǵarǵan «Qajylyq» atty kitaptyń tusaý keser rásimin jasady. Sonymen qatar qajylar «Asyl arna» telearnasy daıyndaǵan «Nurly jol» fılmin tamashalady. Elshiliktiń qonaqasynda qajyǵa kelgen aqsaqaldar ımandylyq týraly oı tolǵap, aq batalaryn berdi.
