Mekkede qasıetti Quran murajaıy ashyldy

ASTANA. KAZINFORM — Kelýshiler sırek kezdesetin qoljazbalar jınaǵyn, Qasıetti Qurannyń tarıhı kóshirmelerin jáne ǵasyrlar boıy qasıetti mátinderdiń saqtalýyn beıneleıtin ınteraktıvti kórneki ekspozıtsııalardy zertteı alady, dep habarlaıdy Kazinform tilshisi.

Mekke aımaǵy gýbernatorynyń orynbasary hanzada Saýd bın Mıshaal bın Abdýlazız sársenbide Hıra mádenı aýdanyndaǵy basty kórneki oryn Quran murajaıyn saltanatty túrde ashty. Atalǵan ortalyq Mekke turǵyndary men qonaqtarynyń dinı jáne mádenı tájirıbesin baıytýǵa arnalǵan, dep habarlaıdy Asharq Al-Awsat.

Mekke qalasy men qasıetti oryndar jónindegi koroldik komıssııanyń basshylyǵymen jáne qoldaýymen ázirlengen rýhanı murajaı bilimdi zamanaýı tehnologııalarmen úılestiredi, dep jazady Saudi Press Agency.

Murajaıda sırek kezdesetin qoljazbalar, Qurannyń tarıhı qoljazbalary qoıylǵan. Sonymen qosa ınteraktıvti vızýaldy ekspozıtsııalar da bar. Olar kelýshilerge qurandy jazý protsesi qalaı júrgizilgenin jáne oǵan ǵasyrlar boıy kútim jasaýdyń qyr-syryn bilýge múmkindik beredi.

Murajaıdyń saltanatty ashylýy tarıhı oryndardy daıyndaý jáne jandandyrý, sondaı-aq mádenı jobalardy ázirleý jónindegi Koroldik komıssııanyń kúsh-jigeriniń arqasynda ótti.

Aıta keteıik, murajaı Hıra mádenı aýdanynyń jobasy aıasynda Hıra taýynyń eteginde ornalastyryldy. Bul mekenniń tarıhı jáne rýhanı mańyzy zor. Sebebi ol quran alǵash ret túsirilgen jer retinde tanymal.

Osyǵan deıin Batys Qazaqstanda órtengen úı ishinde quran janbaı qalǵanyn jazǵan edik.