Mekkede 6 qabatty 50 myń adam syıatyn meshit ashyldy
ASTANA. 3 shilde. QazAqparat - Qasıetti Mekke qalasynda 48 myń adam syıdyratyn ar-Radjıhı meshiti ashyldy. Jańa meshitti an-Nasım aýdanynda Mekkeniń aýdandyq ámiri Halıd al-Feısal saltanatty túrde ashty.
Qazaqstan musylmandary dinı basqarmasynyń resmı saıtynda jazylǵanyndaı, 6 qabattan turatyn jańa meshit osman stılinde jasalǵan. Meshitte jer asty avtoturaǵy, lıft, eskalator men ashana bar. Meshittiń birinshi qabaty namaz oqýǵa jáne dáret alyp, qaıtys bolǵan adamdardy arýlap, jýyndyrýǵa arnalǵan bólme, taharathanalar bar. Sonymen qatar, birinshi qabatta áıelderdiń namaz oqý zaly, kitaphana, dáris zaly, ýakf mınıstri, ımamdardyń bólmeleri ornalasqan.
«Ar-Radjıhı» meshitinde 5 kúmbez bar. Ortalyq jáne eń úlken kúmbezdiń ishki dıametri 19 metr jáne 48 metr bıiktikte ornalasqan. Qalǵan 4 kúmbezdiń árqaısysynyń ishki dıametri 7 metr jáne 37 metr bıiktiginde ornalasqan. Meshittiń jalpy aýmaǵy 10 myń sharshy metrdi quraıdy.
Sonymen qatar, «ar-Radjıhı» meshiti jańa tehnıkalyq quraldarmen jabdyqtalǵan. Meshittiń syrty men ishinde tikeleı efırde kórsetýge arnalǵan spýtnıktik arnalar men beınekameralar ornatylǵan.
