Mekke turǵyndaryna qaýipsiz jerge jasyryný týraly eskertý jasaldy
ASTANA. KAZINFORM — Saýd Arabııasynda Iemendegi «Ansar Allah» qozǵalysynyń shabýyldaryna baılanysty Mekke, Jıdda, Taıf, ıAnbý jáne Tabýk qalalaryna qaýip tónýi múmkin ekeni eskertildi. Keıin bılik qaýiptiń seıilgenin málimdedi, dep habarlaıdy Kazinform agenttigi Anadolu-ǵa silteme jasap.
Saýd Arabııasynyń Azamattyq qorǵanys bas basqarmasy Mekke, Jıdda, Taıf, ıAnbý jáne Tabýk qalalaryna qaýip tónýi múmkin ekenin eskertti.
Turǵyndarǵa qaýipsizdik sharalaryn saqtap, azamattyq qorǵanys qyzmetteriniń nusqaýlaryn oryndaý, adam kóp jınalatyn oryndardan aýlaq bolý jáne foto-vıdeo túsirilim jasamaý eskertildi.
Keıin Saýd Arabııasynyń Azamattyq qorǵanys bas basqarmasy qaýiptiń seıilgenin habarlady.
Eske salaıyq, buǵan deıin AQSh-tyń Taıaý Shyǵystaǵy elshilikteri Saýd Arabııasyndaǵy nysandarǵa hýsıtterdiń shabýyldarynan keıin amerıkalyq azamattardy saq bolýǵa úndegen edi.
Bahreın, Izraıl, Irak, Iordanııa, Kýveıt, Lıvan, Oman, Katar, Saýd Arabııasy jáne Birikken Arab Ámirlikterindegi AQSh dıplomatııalyq ókildikteri qaýipsizdik salasyndaǵy jaǵdaı kúrdeli kúıinde qalyp otyrǵanyn málimdedi.
– Áskerı qaqtyǵys tez arada ýshyǵýy múmkin, – delingen AQSh dıplomatııalyq ókildikteriniń eskertýinde.
Sondaı-aq amerıkalyq azamattarǵa áýe reısteriniń toqtatylýy, áýe keńistiginiń jabylýy jáne kólik qatynasyndaǵy irkilister bolýy múmkin ekeni eskertilgen.
