Mekke murajaıynda qazaq tilindegi aýdıogıd engiziledi - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ortalyq bank memlekettik til men ashyqtyq talaptaryn buzǵan 18 bankke aıyppul saldy — ÓzA
Ózbekstan Respýblıkasynyń Ortalyq banki kommertsııalyq bankterdiń resmı veb-saıttarynda aqparatty ashý jaǵdaıyn tekserý nátıjesinde 18 bankke jalpy kólemi 1 mıllıard 836 mıllıon sým aıyppul saldy, dep habarlaıdy «ÓzA» aqparat agenttigi.
Keltirilgen derekterge súıensek, bıylǵy qyrkúıek–qazan aılarynda Ortalyq bank kommertsııalyq bankterdiń veb-saıttaryna monıtorıng júrgizgen. Tekserý barysynda birqatar kemshilik pen zań buzý anyqtalǵan.
Atap aıtqanda, keıbir bankter «Ózbekstan Respýblıkasynyń Memlekettik tili týraly» zań talaptaryn oryndamaǵan, ıaǵnı óz saıttarynda aqparatty memlekettik tilde jarııalamaǵan. Sonymen qatar, keıbir bankter nesıe qamtamasyz etýge qabyldanǵan kepil múlikterin qaryz qaldyǵyna sáıkes kezeń-kezeńimen kepilden shyǵarý tártibin de jarııa etpegen.
Bul talaptardy buzǵan bankter qatarynda 19 bank bar eken.
Habarlamada aıtylýynsha, Ortalyq bank árbir ereje buzǵan bankke 102 mıllıon sýmnan aıyppul saldy. Sonymen qatar, barlyq bankke anyqtalǵan kemshilikterdi joıý jáne veb-saıttardaǵy aqparatty zańnama talaptaryna tolyq sáıkestendirý týraly nusqaýlar jiberildi.
Sondaı-aq osy aptada «ÓzA»-da «Túrkistan delegatsııasy Horezmge keldi» degen taqyryptaǵy aqparat jarııalandy.
Ózbekstandyq BAQ-tyń dereginshe, Horezm oblysynyń ákimi Jýrabek Rahımov Qazaqstan Respýblıkasynyń Túrkistan oblysy ákimi Nuralhan Kósherovpen kezdesken.
Kezdesý barysynda týrızm salasyndaǵy yntymaqtastyqty keńeıtý, birlesken týrıstik baǵyttardy ázirleý, ınvestıtsııalyq jobalardy júzege asyrý, sondaı-aq mádenı jáne gastronomııalyq týrızmdi damytý máseleleri talqylanǵan.
Aıta keteıik, taraptar kópjyldyq tatý kórshilik pen baýyrlastyq qatynastardy odan ári bekemdeı túsýge baǵyttalǵan keleshek josparlardy kelisip aldy.
Sapar aıasynda eki óńirdiń kásipkerleri men bıznes ókilderi arasynda ótken kezdesýler de ózara tıimdi seriktestikke jol ashty.
Sonymen qatar, tarıhy men búgini úndesken Túrkistan men Horezm oblystarynyń týrıstik áleýeti, kóne dáýirlerge jeteleıtin mádenıeti, qala qurylysy men sáýlet óneri, sondaı-aq týrısterdi qabyldaý múmkindigi salanyń mamandary tarapynan keńinen tanystyryldy.
Qytaıdyń Ulttyq spartakıadasynda úsh etnıkalyq qazaq júldeli orynǵa ıe boldy — CNR
Qytaıdyń Shenchjen qalasynda ótip jatqan XV búkilqytaılyq spartakıadada qytaılyq Baıqonys Danabekuly, Aqjol Tursynuly jáne Saltanat Erenbekuly syndy úsh shyńjańdyq sportshy júldeli orynǵa ıe boldy dep habarlaıdy Qytaıdyń Ortalyq halyq radıosy.
Atalǵan BAQ-tyń dereginshe, Shenchjen qalasynda ótip jatqan XV búkilqytaılyq spartakıadada bokstan erler arasyndaǵy 92 keliden joǵary salmaq dárejesiniń fınalynda Gýandýn provıntsııasynyń atynan dodaǵa túsken qazaq sportshysy Baıqonys Danabekuly chempıon atandy.
Aıta keteıik, Baıqonys aqtyq synda Qytaı Qoǵamdyq qaýipsizdik salasy boıynsha sport qaýymdastyǵynyń ókili Ma Tszınıandy aıqyn basymdyqpen jeńdi.
Sondaı-aq 11 qarasha kúni tústen keıin XV búkilqytaılyq spartakıadada erkin kúres túri boıynsha 74 keli salmaq dárejesindegi jarysynda shyńjańdyq sportshy Aqjol Tursynuly kúmis medal aldy.
Al, 12 qarasha kúni tústen keıin atalǵan ulttyq spartakıadada erler klassıkalyq kúresiniń 60 keli salmaq dárejesi boıynsha shyńjańdyq sportshy Saltanat Erenbekuly qola medal enshilegen.
Mekke murajaıynda qazaq tilindegi aýdıogıd engiziledi — «Eurasia Today»
Mekkedegi Saǵat munarasy murajaıynda qazaq tilindegi aýdıogıd engiziledi.
«Eurasia Today» aqparat agenttiniń habarlaýy boıynsha, bul týraly Qazaqstannyń Jıdda qalasyndaǵy Bas konsýly Rýslan Qospanov pen Mekkedegi Saǵat munarasy murajaıynyń dırektory Naıf ál-Malıkımen kezdesýinde talqylandy.
Taraptar kezdesýde týrızm, ǵylym jáne mádenıet salalarynda yntymaqtastyqty talqylap, birneshe kelisimge keldi.
Atalǵan basylymnyń dereginshe, alǵashqy kezeńde qazaqstandyqtarǵa murajaıǵa kirýde jeńildikter usynylyp, resmı delegatsııalar úshin arnaıy sharttar engiziledi.
Sondaı-aq murajaıdyń aýdıogıd júıesine endi qazaq tili qosylady.
Kezdesý qorytyndysynsha taraptar turaqty baılanys ornatyp, qol jetkizilgen ýaǵdalastyqtardy resmı túrde bekitý maqsatynda tıisti qujattardy daıyndaýǵa kelisken.
Aıta keteıik, Mekkedegi Saǵat munarasy murajaıy ál-Haram meshitine qarsy ornalasqan. Saǵat Gınnestiń rekordtar kitabyna engen.
WeChat arqyly Qytaı-Qazaqstan kedendik elektrondy kezek resmı túrde iske qosyldy — «Halyq gazeti»
10 qarashada saǵat 00:00–de Qytaıdyń Wechat uıaly baılanys qosymshasy jańa shaǵyn baǵdarlamany resmı túrde iske qosty. Shaǵyn baǵdarlama arqyly qytaılyq júrgizýshiler elden shyǵar aldynda Qazaqstan shekara ınspektsııasy arnasynda kedendik tekserýge jazyla alady, dep jazady qytaılyq «Halyq gazeti» basylymy.
Habarlamalarǵa sáıkes, bul júıe qytaılyq júrgizýshilerge kezekke turýǵa jáne qazaqstandyq shekara ınspektsııasy arnasynda tirkelýge jeke kvota bóledi. Qytaı-orys eki tildi ınterfeıs jumysty jeńildetedi. Qazaqstandyq elektrondy kezek júıesin paıdalaný kezinde qytaılyq júrgizýshilerdiń tildik kedergisin joıyp, basqa da qolaısyzdyqtardy boldyrmaıdy. Sol sııaqty agenttikke qyzmet kórsetýdiń joǵary shyǵyndary máselesin sheshýge kómektesedi.
Qytaılyq BAQ-tyń dereginshe, bul shaǵyn baǵdarlamanyń iske qosylýy Qytaı-Qazaqstan halyqaralyq avtomobıl kóligi yntymaqtastyǵyn tereńdetýdiń mańyzdy sharasy.
Kelesi qadamda eki tarap shaǵyn baǵdarlamanyń fýnktsııalaryn ońtaılandyrýdy, júrgizýshilerdiń keri baǵasy negizinde jetildirýdi, sondaı-aq Qytaı men Qazaqstan arasyndaǵy ózara baılanysty ilgeriletý úshin Qytaı-Qazaqstan elektrondyq lıtsenzııa júıesin qondyrýdy jedeldetedi.
Sonymen qatar osy aptada «Halyq gazeti» basylymynda «Beıjińdegi Qazaqstan mádenıet ortalyǵy» degen aqparat jaryq kórdi.
Jaqynda Beıjińde Qazaqstannyń sheteldegi tuńǵysh mádenıet ortalyǵy ashylǵan bolatyn.
Bul jobany júzege asyrý eki el arasyndaǵy mádenı almasýdyń jańa kezeńin bildiredi. Bul sondaı-aq qazaqstandyq mádenıetti halyqaralyq arenada nasıhattaýǵa mańyzdy úles qosady. Sonymen birge Qazaqstan men Qytaı arasyndaǵy mádenı baılanystar men strategııalyq seriktestikti odan ári tereńdetedi.
Qytaılyq BAQ-tyń málimetinshe, Mádenıet ortalyǵy Beıjińniń negizgi iskerlik aýdanynda ornalasqan, 620 sharshy metr aýmaqty alyp jatyr. Ol qazaqstandyq dástúrlerdi, ónerdi, tildi, tarıhty jáne etnıkalyq taǵamdardy kórsetýge, sondaı-aq túrli is-sharalardy ótkizýge arnalǵan alań retinde qyzmet etedi.
Iran qyzdary bir jylda 868 álemdik medal jeńip aldy — ParsToday
Irannyń sport jáne jastar mınıstri ótken jyly áıelder sektsııasynda 307-den astam halyqaralyq darystar ótkizilgenin jáne ırandyq áıel sportshylar bedeldi álemdik jarystarda 868 medal jeńip alǵan, onyń 140-y altyn medal, dep habarlady ParsToday aqparat agenttigi.
Irandyq BAQ-tyń dereginshe, Iran Islam Keńesi Májilisiniń ashyq otyrysynda sport jáne jastar mınıstri Ahmad Donıomalı mınıstrliktiń jumysy týraly esep berdi. Áıelder sportynyń tamasha jetistikterine toqtala otyryp, ol bul jetistikterdi ırandyq áıelderdiń qulshynysy men tabandylyǵynyń belgisi dep sanap, eldiń áıelder qaýymdastyǵyn quttyqtady.
Donıomalı sonymen qatar Sadak júıesinde 11500 sport nysanynyń tirkelgenin jarııalap, Konstıtýtsııanyń 44-shi babynyń saıasatyn júzege asyrýǵa sáıkes «Persepolıs» jáne «Esteglal» klýbtarynyń aktsııalarynyń úlken bóligi basqaǵa berilgenin jáne sporttyq aktıvterdi qalyptastyrý úshin qajetti sharalar qabyldanyp jatqanyn qosty.
Túrkııada 5 000 jyldyq arpa dánderi tabyldy — TRT
Túrkııada 5 000 jyldyq arpa dánderi tabyldy. Bul jańalyq aımaq aýyl sharýashylyǵy men qonystanýy týraly mańyzdy málimetter beredi. Pesh, qysh ydystar men dán úgitetin tastardan turatyn, jaqsy saqtalǵan asúı orny ˗ úlken ǵylymı mańyzy bar jańalyq bolyp otyr. Arheologtar Túrkııanyń shyǵysyndaǵy Van óńirinde ornalasqan Iremır tóbeshiginde erte qola dáýirine jatatyn shamamen 5 000 jyl burynǵy kómirge aınalǵan arpa dánderin tapty.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, Iúzúnjú Iyl ýnıversıteti Ádebıet fakýlteti arheologııa kafedrasynyń oqytýshysy jáne qazba jumystaryna jetekshilik etken professor Hanıfı Bıberdiń aıtýynsha, tabylǵan zattar aımaqta eginshilik mádenıetiniń damyǵanyn kórsetedi.
Qazba kezinde peshi bar asúı, qysh ydystar, astyńǵy jáne ústińgi úgitkish tastar, usaq mal súıekteri jáne synǵan úlken qumyranyń ishinen jáne aınalasynan arpa dánderi tabylǵan.
Túrkııalyq baslymnyń málimetinshe, zertteýshiler ár túrli dáýirge jatatyn segiz mádenı qabat anyqtaǵan bul tóbeshikte aımaqtaǵy eń kóne qonys orny tabylǵan. Professor Hanıfı Bıber negizgi qabattardyń erte qola dáýirinde Shyǵys Anadoly men Ońtústik Kavkazǵa taralǵan Kýra-Araks (erte Transkavkaz) mádenıetine tıesili ekenin aıtqan.
Sondaı-aq «TRT» basylymynda «Jeltoqsannyń 15-i «Túrki tilderi otbasynyń halyqaralyq kúni» dep jarııalandy» degen taqyryptaǵy aqparat jaryq kórdi.
ıÝNESKO 15 jeltoqsandy Túrki tilderi otbasynyń halyqaralyq kúni retinde belgiledi. Bul kún túrki tildes memleketterdiń ortaq tili, mádenıeti men qujattyq murasyn nasıhattaýǵa arnalǵan.
Ózbekstannyń tarıhı Samarqand qalasynda 30 qazanda bastalǵan ıÝNESKO-nyń 43-shi Bas konferentsııasynda Túrkııa prezıdenti Rejep Taıyp Erdoǵannyń usynysy boıynsha 15 jeltoqsandy Túrki tilderi otbasynyń halyqaralyq kúni retinde belgileý týraly qarar jobasy talqylanyp, maquldandy. Bul konferentsııaǵa 194 elden 5000-nan astam qatysýshy jınaldy jáne ol 13 qarashaǵa deıin jalǵasady.
Túrkııalyq BAQ-tyń dereginshe, ıÝNESKO Túrkııa Respýblıkasy prezıdenti Erdoǵannyń usynysyn qabyldaǵan.
Aıta ketý kerek, túrki tilderin 200 mıllıonnan astam adam qoldanady, bul keń geografııada ortaq tarıh pen qundylyqtar arqyly órilgen baı mádenı murany bildiredi.