Mekenjaı derekteri ózgergende turǵyndar qandaı kedergige tap bolady
NUR-SULTAN. QazAqparat - Búginde mekenjaı men jyljymaıtyn múlik derekteriniń ózgerýinen turǵyndar keıbir kedergige tap bolady. Bul týraly Parlament Májilisiniń jalpy otyrysynda memlekettik qyzmetter kórsetýge arnalǵan zań jobasyn talqylaý kezinde málim boldy, dep habarlaıdy QazAqparat tilshisi.
«Qazirgi kezde azamattar tarapynan kóptegen narazylyq týǵyzatyn jaǵdaı - ol memlekettik organdardyń sheshimderi saldarynan mekenjaı men jyljymaıtyn múlik derekteriniń ózgerýine baılanysty. Mysaly, memlekettik organdardyń sheshimi boıynsha kósheniń ataýy nemese úılerdiń nómirlenýi ózgerip ketip, turǵyndardyń óz qujattaryna ózgerister engizýine týra keledi. Óıtkeni úıdiń mundaı qujattaryn bank te, notarıýs ta qabyldamaıdy. Buǵan keminde 10 jumys kúni qajet bolady. Aldymen, Halyqqa qyzmet kórsetý ortalyǵy arqyly mekenjaıdyń ózgerýi týraly anyqtama alý nemese mekenjaıdy anyqtaý úshin sáýlet basqarmasyna júginý kerek, buǵan 7 jumys kúni ketedi. Sodan keıin taǵy 3 kún ózgeristerdi tirkeýge arnalǵan ótinish qaralady», - dep túsindirdi Májilis depýtaty Maıra Aısına.
Zań jobasynda memlekettik organdardyń sheshimi boıynsha, onyń ishinde eldi mekenderdiń ataýy, kóshelerdiń ataýy, sondaı-aq ǵımarattar men ózge de qurylystardyń rettik nómiri ózgergen kezde, jyljymaıtyn múliktiń sáıkestendirý sıpattamalaryna ózgeristerdi tirkeýdiń aqparattyq júıelerin ıntegratsııalaý arqyly avtomatty túrde júzege asyrylatyny kózdelgen.
Palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Budan buryn habarlanǵandaı, atalǵan zań jobasy aıasynda zeınetaqy qujattaryn rásimdeýde ózgerister bolady.
Sonymen qatar, Qazaqstan aýmaǵyndaǵy kez kelgen tirkeýshi organǵa ótkizýge bolatyny aıtylǵan edi.
