Mekenjaı boıynsha tıesili mektep balany qabyldamasa, kimge júginý kerek

ASTANA. KAZINFORM – Astanadaǵy óńirlik kommýnıkatsııalar qyzmetinde ótken baspasóz máslıhatynda qalalyq bilim basqarmasynyń basshysy Qasymhan Senǵazıev balasyn turǵylyqty mekenjaıy boıynsha mektepke kirgize almaı júrgen ata-analarǵa jón siltedi.

«Jalpy qalada mektep oryndarynyń tapshylyǵy bar ekeni barshaǵa málim. Sol tapshylyqty sheshý úshin 34 mektep salyp jatyrmyz. Bıyl sonyń 25-inde qurylys aıaqtalady. Sondyqtan qazir mektepterge tapsyrma berildi. Búkil mektepter barlyq balany ózderiniń turǵyn mekenjaılary boıynsha oqýmen qamtamasyz etý kerek. Eger qamtamasyz etpeı jatsa, Bilim basqarmasynyń qasynan qurylǵan shtabqa habarlasý kerek. Onyń nómirleri: 55-68-70, 55-68-81, 55-68-87 jáne 55-74-62. Osy nómirlerge habarlassa, bizdiń qyzmetkerler balalarǵa, ata-analarǵa kómektesýge daıyn otyr», - dedi basqarma basshysy.

Sonymen qatar, ákimdik ókili astanalyqtar balasynyń turǵyn mekenjaı boıynsha qaı mektepke tirkelýi kerek ekenin Astana qalasy bilim basqarmasynyń resmı saıtynan kórýge bolatynyn eske saldy.