Mekemelik nagradalar qyzmet babynda qaza bolǵan qaharmandardyń esimimen atalady
ASTANA. KAZINFORM — Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde jańa bastama kóterdi.
- Men mekemelik nagradalarǵa qyzmet babynda qaza bolǵan qaharmandardyń esimin berý máselesin qarastyrýdy usynamyn. Sondaı-aq kósheler men quqyq qorǵaý mekemelerin batyrlardyń atymen ataýǵa bolady.
Mundaı tájirıbe elimizde burynnan bar. Lańkesti ustaý kezinde erlikpen qaza tapqan Halyq qaharmany Ǵazız Baıtasovtyń esimi Tarazdaǵy ortalyq kóshelerdiń birine berildi. Sondaı-aq qaladaǵy oqý-jattyǵý polıgony da batyrdyń atymen atalǵan. Taıaýda onyń ómiri men erligi týraly «Kapıtan Baıtasov» atty kórkem fılm kórermen nazaryna usynylmaq.
Órt sóndirý kezinde opat bolǵan Asqar Zabıkýlın de eldiń esinde. Astanadaǵy Órt sóndirý bólimine jáne sol bólim ornalasqan kóshege onyń esimi berildi. Bul azamattardy naǵyz beıbit kúnniń batyrlary deýge bolady. Olar aqtyq demi qalǵansha antqa adal boldy, qyzmettik paryzyn óteý jolynda óz ómirlerin qurban etti, - dedi Prezıdent
Ol elge jáne zańǵa qyzmet etýge bel býǵan árbir azamat adamgershilik pen ádildik qundylyqtaryn basshylyqqa alatynyn jetkizdi.
- Qylmysqa qarsy kúresti qasterli paryz dep sanaıdy. Mundaı qasıetter adamǵa, eń aldymen, otbasyndaǵy tárbıe arqyly beriledi. Quqyq qorǵaý salasynda ata-anasynyń jolyn qýyp, otbasy dástúrin jalǵastyryp júrgen qyzmetkerler az emes. Qazir biz úsh atadan beri tártip saqshysy bolǵan Zaınýlınder áýletiniń ókilderin marapattaımyz. Men búgin barsha quqyq qorǵaý júıesiniń ardagerlerine zor alǵys aıtamyn. Sizderdiń minsiz qyzmetterińiz – óskeleń urpaqqa úlgi-ónege.
Jalpy, zań men tártip uǵymy kóshedegi tazalyq pen qaýipsizdik sııaqty qarapaıym nárseden bastalady. Jergilikti bılik, bıznes jáne qoǵam belsendileri ortaq múdde jolynda kúsh biriktirip jumys istese, qoǵamdaǵy zań men tártip te nyǵaıa túsedi. Qazir Aqmola oblysynda «Zııaly qaýym» jobasy júzege asyrylyp jatyr. Aýyl ákimderi, aqsaqaldar jáne sharýa qojalyqtarynyń basshylary birlesip, ýchaskelik ınspektorlarǵa qolǵabys etýde. Jergilikti azamattardyń osyndaı úlgili isine qoldaý kórsetý kerek. Bul – azamattyq jaýapkershiliktiń aıqyn kórinisi, - dedi Qasym-Jomart Kemeluly.
Sondaı-aq ol bes jylda birde-bir qylmys tirkelmegen birqatar aýyldyń aqsaqaldaryn marapattaıtynyn málimdedi.
- Quqyq qorǵaý organdarynyń kóp jumysy syrt kózge kórine bermeıdi. Jedel qyzmetkerler, tergeýshiler, prokýrorlar, krımınalıster, patrýl qyzmetkerleri, ýchaskelik ınspektorlar men basqa da qurylym qyzmetkerleri kún saıyn el tynyshtyǵyn qas qaqpaı kúzetýde. Eshqandaı qaýip-qaterge qaramastan, Otan úshin jasap jatqan adal qyzmetterińizge zor rızashylyǵymdy bildiremin. Men Sizderge senemin! Árqaısysyńyz myqty maman, otanshyl ári adal azamat degen atqa laıyqsyzdar.
Árıne, quqyq qorǵaý mekemeleriniń jumysynda eshqandaı qatelik nemese jetispeýshilik joq dep aıtýǵa bolmaıdy. Biraq qara bultty tóndirýdiń de qajeti joq. Bárimiz bir el, bir halyq bolyp Qazaqstanymyz úshin qyzmet etip, tabandy jumys isteýimiz kerek. Bul – barshamyzǵa ortaq ulttyq paryz, azamattyq borysh. Qazaqstan qaýipsiz, zań men tártipke baǵynatyn el bolýy kerek.
Sondyqtan meniń tapsyrmam boıynsha Prezıdent Ákimshiligi men Qaýipsizdik Keńesi bir aptanyń ishinde Quqyq qorǵaý organdarynyń jumysy týraly arnaıy taldaý daıyndaýy kerek. Barlyq túıtkilderdi ashyq túrde kórsetedi, máselelerdi sheshý joldaryn usynady. Bul – óte mańyzdy jumys, ony jalǵastyrý qajet. Túptep kelgende, bizdiń basty baǵdarymyz – aıqyn. Bul – zań men tártip qaǵıdaty. Qyzmetterińizge tabys tileımin! - dep aıaqtady sózin Memleket basshysy.
Keńeıtilgen alqa májilisinde Bas prokýror Berik Asylov, Premer-mınıstrdiń birinshi orynbasary Roman Sklıar, Іshki ister mınıstri Erjan Sádenov, Cybaılas jemqorlyqqa qarsy is-qımyl agenttiginiń tóraǵasy Ashat Jumaǵalı, Qarjylyq monıtorıng agenttiginiń tóraǵasy Janat Elımanov sóz sóıledi.
Aıta keteıik, zań jáne quqyq akademııasy túlekterine birden «aǵa leıtenant» sheni berilýi múmkin.