Mekemelik marapattardyń biryńǵaı standartyn jasaý qajet – Prezıdent

ASTANA. KAZINFORM – Memleket basshysy vedomstvolyq nagrada – naǵyz bilikti mamandarǵa ǵana beriletin nagrada ekenin aıtty.

- Biz sońǵy jyldary memlekettik nagradalar máselesin qaıta qarap, bir júıege túsirdik. Endi vedomstvolyq (mekemelik) marapattardy retke keltirý qajet. Memlekettik organdar bul jumysty nazardan tys qaldyrdy. Naqty ereje joq, bárine ortaq málimetter qory da joq. Sonyń kesirinen keıbir marapattar orynsyz taratylyp jatyr. Tipti, bir memlekettik organnyń tósbelgisin bir adam birneshe ret alǵan jaıttar da kezdesedi, - dedi Qasym-Jomart Toqaev ulttyq quryltaıda. 

Memleket basshysynyń aıtýynsha, vedomstvolyq nagrada – naǵyz bilikti mamandarǵa ǵana beriletin, sol arqyly kásibı mártebeni kóteretin mańyzdy nagrada. 

- Buǵan beı-jaı qaraýǵa bolmaıdy. Sondyqtan mekemelik marapattardyń biryńǵaı standartyn jáne tizimin jasaý qajet. Árıne, ár mekemeniń óz ereksheligin eskergen jón. Biraq bárine ortaq ustanym bolýy kerek. Quzyrly organdarǵa osy sharýany qolǵa alýdy tapsyramyn, - degen mindet júktedi Prezıdent. 

Buǵan deıin Memleket basshysy qazaq tilinde túsirilgen mýltfılmder kóp bolýy qajettigin aıtqan edi.