Mekeme basshylarynyń shetelge issapary naqty nátıje berýi kerek – Prezıdent

ASTANA. KAZINFORM – Barlyq memlekettik organ el ekonomıkasyna meılinshe kóbirek ınvestıtsııa tartýǵa basa mán berýge tıis. Bul týraly Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysynda aıtty. 

«Investorlarǵa, mysaly, 50 mıllıon dollardan kóp qarjy salýǵa daıyn iri kompanııalarǵa «bir tereze» qaǵıdasymen jan-jaqty qoldaý kórsetken jón. Sonymen qatar, jobalardyń iske asyrylýyn qadaǵalaıtyn tıimdi monıtorıng júıesin iske qosý kerek. Memlekettik organdar paıdasy joq prezentatsııalar men is-sharalar ótkizýmen áýestenbeýge tıis», - dedi Memleket basshysy.

Prezıdent mekeme basshylarynyń shetelge jasaǵan árbir issapary naqty nátıje berýi keregin atap ótti. Sapar qorytyndysy boıynsha Úkimet basshylyǵyna nemese qajet bolǵan jaǵdaıda Prezıdentke esep berilýi kerek.

«Investıtsııalyq jobalardy iske asyrýǵa qatysty kedergiler ásirese, aımaqtarda jıi bolyp turady. Ákimder ınvestıtsııa tartýdyń ornyna eski ádetke salyp, bıýdjet qarajatyna senip otyrady. Al, aımaqtarǵa baryp, jumys istegisi keletin ınvestor kóptegen tosqaýylǵa tap bolady. Jergilikti bılik kóp jaǵdaıda eshqandaı áreket jasamaıdy ne bolmasa ınvestordy áýre-sarsańǵa salady. Sonyń kesirinen kásipker jobasyn keıinge shegeredi nemese birjola toqtatýǵa májbúr bolady», - deıdi Prezıdent.

Aımaqqa jeke ınvestıtsııa tartý ákimderdiń eń basty mindetiniń biri bolýy kerek. 

«Jalpy, barlyq memlekettik organ el ekonomıkasyna meılinshe kóbirek ınvestıtsııa tartýǵa basa mán berýge tıis. Bul – negizgi basymdyq, olardyń jumysy da soǵan sáıkes baǵalanýy kerek. Másele shtat sanyn kóbeıtip, jumys tobyn quryp, jańa tujyrymdama jazýda emes. Bul, eń aldymen, memlekettik apparattyń jumys isteý tásilin ózgertetin naqty reforma. Sony durys túsiný qajet. Biz jarty jyldyń nátıjesi boıynsha Investıtsııalyq shtabtyń jumysyn qorytyndylaımyz. Árbir mınıstr men ákimniń osy baǵytta atqarǵan jumysyna naqty baǵa beremiz. Talap qatań bolady», - dep eskertti Qasym-Jomart Toqaev.