Mehıkoda qala ishinde jeke kólikpen júrýge tyıym salyndy
ASTANA. QazAqparat - Meksıka astanasy Mehıko qalasynda aýanyń lastanýy shekti deńgeıge jetti. Jaǵdaıdy retke keltirý úshin qala basshylyǵy azamattardyń jekemenshik kóligimen shahar aýmaǵynda júrýine ýaqytsha tyıym salǵan, dep habarlady www.24.kz.
Turǵyndardyń deni endi qajet jerine qoǵamdyq kólik nemese velosıpedpen barady. Olardyń ishinde jańa tártipke kóndige almaı júrgenderi de az emes. Qala ishinde jeke kólikpen júrýge tyıym salyndy. Aýa lastanǵan soń osyndaı ereje qabyldandy. Mamandardyń bulaı dabyl qaǵýynda sebep te joq emes. Aýa quramyndaǵy ýly zat shekti deńgeıden eki esege asyp ketken. Onyń saldarynan 2 mıllıon kólik qańtarylyp tur. Endi apta ishinde júrgizýshiler ózine belgilengen kúni kóligin tizgindeı alady. «Bul taksı júrgizýshilerin tyǵyryqqa tiredi», - deıdi júrgizýshi Hýan Kastıllo.
Óz kóligin minip, dittegen jerine jete almaǵan turǵyndar jappaı qoǵamdyq kólikter men jalǵa beriletin velosıpedterge otyra bastady. Degenmen, ondaǵy jaǵdaı máz emes. Taksı qyzmeti eki esege qymbattaǵan. Avtobýstardyń birinde ıne shanshar oryn bolmaı tolyp kelse, endi biri ýaqytynan keshigedi. Aýaǵa bólinetin zııandy zattardy azaıtý maqsatynda engizilgen ereje óndiris oryndaryn da aınalyp ótpedi. Zań boıynsha endi bul mekemeler aýaǵa bólinetin zııandy qaldyq kólemin 30-40 paıyzǵa deıin qysqartýǵa mindetti.
«Óte durys sheshim. Mundaı qadamǵa osydan birtalaı jyl buryn barýǵa tıis edik. Aýaǵa bólingen ýly gazdarǵa baqylaý bolmaǵandyqtan, osyndaı jaǵdaıǵa tap boldyq. Biraq men bıliktegiler durys sheshim qabyldady dep sanaımyn», - deıdi Injenerııa salasyn damytý ortalyǵynyń dırektory Karlos Antonıo Kaballero.
Meksıkadaǵy aýanyń shekten tys lastanǵany týraly habar 14 jyldan keıin taǵy tarady. Qazir munda aýaǵa zııandy zat bóletin kez-kelgen áreket jasaýǵa tyıym salynǵan, tipti jol jóndeý jumystary da toqtatylǵan. Bıliktegiler mundaı sharalardyń jańbyrly maýsym bastalǵanǵa deıin jalǵasýy múmkin ekenin aıtyp otyr.
