MEGA Center Kz saýda úıiniń tóbesindegi áınektiń qulaýyna qatysty resmı túsinik berdi

«Jýyrda kúmbezdiń bannerleri aýystyrylǵan. Jóndeýshiler shyny paketterdiń birin kezdeısoq qozǵap jibergen bolýy múmkin. Qazir kúmbezdi mamandar tekserip jatyr. Basshylyq montajdaý jumystaryn júrgizý barysynda qosymsha baqylaý engizý sheshimin qabyldady. Mamandar kúmbezge turaqty baqylaý júrgizetinin aıta keteıik», - dep habarlady D.Býblık. Sondaı-aq oqıǵa barysynda úsh adamnyń zardap shekkeni habarlandy. «Bir adam aýrýhanaǵa barýdan bas tartty. Eki adam ákimshilik ókiliniń jeke qadaǵalaýymen aýrýhanaǵa jetkizdi. Jaraqattary aýyr emes, deneleri azdap syrylǵan», - dedi MEGA kommýnıkatsııalar departamentiniń dırektory. Al osyǵan deıin Astana qalasy TJ departamentiniń baspasóz qyzmetinde MEGA-da oryn alǵan oqıǵa tótenshe jaǵdaıǵa jatpaıtynyn málimdegen edi. TJD oqıǵanyń mán-jaıyn keıinirek habarlaıtynyn aıtty. Oqıǵa ornyna 103 qyzmetiniń qyzmetkerleri shaqyrtylǵan edi. Qalalyq jedel medıtsınalyq kómek stansasynan habarlaǵandaı, zardap shekkender týraly aqparatty olar elordalyq densaýlyq saqtaý basqarmasynyń kelisimimen ǵana taratýǵa quqyly eken. Eske salsaq, keshe MEGA ortalyǵy tóbesindegi áınek-kúmbezdiń bir bóligi qulady. Oqıǵa jaıly alǵashqy aqparat áleýmettik jeli paıdalanýshylary taratty. «Megada tóbeden áınek qulady...sondaı qatty dybys shyqty... áıelge kómek kórsetilip jatyr... qatty shoshynǵan qyz bala jylap jatyr», - dep jazdy Feısbýk áleýmettik jelisinde oqıǵa kýágeri bolǵan Laýra Baıtursynova. Ol sondaı-aq oqıǵanyń sýretin jarııalaǵan.