«Mega Astana» saýda ortalyǵynda 35 myń eýro men 100 myń teńgeni urlaǵan grýzııalyq azamat ustaldy
ASTANA. QazAqparat - Elordalyq polıtseıler 35 myń eýrony urlady degen kúdikpen Grýzııa azamatyn ustady, dep habarlaıdy Astana qalalyq ІІD-niń baspasóz qyzmetinen.
28 qarashada jedel basqarý ortalyǵyna «Mega Astana» saýda ortalyǵyndaǵy dámhanaǵa kelýshiniń 35 myń eýro jáne 100 000 teńge kólemindegi iri aqsha somasynyń urlanǵany týraly habarlama kelip tústi.
Oqıǵa ornyna jedel jetken krımınaldyq polıtsııa qyzmetkerleri jábirlenýshiniń aqshasyn kúrtesiniń ishki qaltasynda ustaǵanyn anyqtady. Dostarymen dámhanada otyrǵan ol kúrtesin ústeliniń qasynda turǵan ilgekke iledi. Aqshasynyń urlanǵanyn dámhanadan keter kezde ǵana biledi. Oqıǵa ornyn tekserý kezinde polıtsııa qyzmetkerleri ilgekten qara tústi er adamnyń paltosyn tapty. Kýágerlerden suraý jáne beınetaspa jazbalaryn qaraý kezinde paltonyń dámhanaǵa kelgen shamamen 60 jastaǵy er adamdiki ekeni anyqtaldy. Paltosyn ilip qoıǵan ol dámhanadan shyǵyp, qaıta oralmaǵan. Kúdiktiniń belgilerin anyqtaǵan polıtseıler onyń izine tústi. Urlyqty jasaǵan er adam taksıge minip ketken, ári onyń sol kúni-aq elordadan ketip qalǵany belgili boldy. Jedel izdestirý sharalaryn júrgizý barysynda kúdikti 3 jeltoqsanda Jambyl oblysynyń Qordaı aýdanynan tabyldy. Onyń naqty málimetteri de anyqtaldy - ol 1953 jyly dúnıege kelgen Grýzııa eliniń K. esimdi azamaty bolyp shyqty. Qazirgi ýaqytta er adam Astana qalalyq ІІD-niń ýaqytsha ustaý oqshaýlaǵyshyna qamaldy. Atalǵan fakti boıynsha QR QK-niń 175-shi babynyń 3-shi bólimimen qylmystyq is qozǵaldy. Tergeý amaldary júrgizilýde. Ustalǵan azamattyń osyǵan uqsas qylmystarǵa qatystylyǵy tekserilýde.
