Mefedron ótkizýmen aınalysqan qylmystyq top quryqtaldy
Uıymdasqan qylmysqa qarsy kúres basqarmasy men Kóliktegi polıtsııa departamenti Tergeý basqarmasynyń qyzmetkerleri 29 qazan kúni «Búrkit» jaýyngerlerin tarta otyryp, Astana men Almatyda uzaq ýaqyt boıy «Mefedron» psıhotroptyq zattaryn daıyndaýmen jáne taratýmen aınalysqan qylmystyq topty ustady. Top 4 adamnan turǵan.
Tekserý kezinde kúdiktilerdiń psıhotroptyq zattardy Almatydan Astanaǵa jeke tasymaldaýshylar arqyly avtomobılderdiń qosalqy bólshekterine jasyryp tasymaldaǵany anyqtaldy.
Almatyda kólik polıtseıleri garaj retinde jasaqtalǵan zerthanany anyqtady, onda psıhotroptyq zattardy daıyndaýǵa arnalǵan 26-dan astam jabdyq, esirtkini daıyndaýǵa arnalǵan 500 lıtr hımııalyq kontsentrat, sondaı-aq 1 keliden astam daıyn psıhotroptyq zat tabyldy.
«Qazirgi ýaqytta atalǵan fakti boıynsha QR QK-niń 297-babymen tergeý júrgizilip jatyr. Ustalǵandar kinásin moıyndady, olardyń barlyǵy ýaqytsha ustaý ızolıatoryna qamaldy», - dep atap ótti Kóliktegi PD bastyǵy Ońal Bekıev.
Vıdeodan alynǵan kadr