Medvedev ShYU-da erkin saýda aýmaǵyn qurý týraly QazAqparat saýalyna jaýap berdi

SOChI. QazAqparat - RF úkimetiniń tóraǵasy Dmıtrıı Medvedev ShYU úkimet basshylarynyń Keńesi otyrysynyń qorytyndysynda BAQ ókilderiniń saýalyna jaýap berdi. «QazAqparat» HAA tilshisi óz tarapynan ShYU-da erkin saýda aýmaǵyn qurý týraly saýal qoıdy.

«Biz qazir erkin saýda aýmaǵyn qurý jumysyn talqylap jatyrmyz. Munda eń aldymen bizdiń negizgi ıntegratsııalyq qurylymymyz, ıaǵnı Eýrazııalyq ekonomıkalyq odaq Vetnammen bir kelisimge kelip qoıǵan. Demek, mundaı erkin saýda aýmaǵy qurylǵan. Ol jumys atqaryp jatyr. Nátıjesi de bar. Biz talqyǵa alǵan máselesi de joq emes. Bul qashan da kúrdeli jaıt. EAEO aıasyna jaqyndaýda Sıngapýr, Izraıl jáne Iran qatarly birneshe memleket bar. Biraq, bul qashan da ekonomıkalyq múdde turǵysynan kúrdeli protsess ekenin atap ótkim keledi», - deıdi Dmıtrıı Medvedev QazAqparat saýalyna jaýap bere otyryp.

Onyń aıtýynsha, ShYU aýqymyndaǵy aýmaq qurý kúrdeli másele.

«Qazirgi tańda biz EAEO jelisi boıynsha birinshi jolmen, QHR-men kelisimge kelý turǵysynan ekinshi jolmen osy suraqty talqylap jatyrmyz. Qytaı ekonomıkasy óte úlken bolǵandyqtan, onyń álemdik ekonomıkaǵa áseri zor. Sondyqtan, sol model turǵysynan pysyqtap alǵan durys», - deıdi reseılik premer.

Ol sonymen qatar, ShYU aıasynda kúnderdiń kúninde ortaq kelisimge kelýge bolatynyna senim bildirdi.

«Biraq, bul ıntegratsııa jasaýdyń joǵary satysy bolady. Munda ShYU-na múshe elderdiń barlyǵynyń qoldaýy kerek», - deıdi D.Medvedev.

Sonymen qatar, Reseı úkimet basshysy Eýrazııa ekonomıkalyq odaqqa múshe, biraq ShYU-nyń quramyna kirmeıtin memleketterdiń de bar ekenin eske saldy. Osyǵan baılanysty, ShYU aıasynda erkin saýda aýmaǵyn qurý kelisimine qol jetkizý úshin eń aldymen EAEO ishinde ózara túsinistik kerek.

«Biraq, bul keleshekte óte qyzyqty ári keleshegi mol ıdeıa sekildi», - dep sózin aıaqtady Dmıtrıı Medvedev.