Medýnıversıtetterdegi stýdentterdiń bilimin táýelsiz saraptama anyqtaıdy
«Qazirgi kúni bizdiń densaýlyq saqtaý salasyndaǵy eń kúrdeli máselelerdiń biri - medıtsınalyq qyzmetterdiń sapasy. Jaqynda ǵana Elbasy Úkimet basshysyna osyǵan baılanysty tapsyrma bergen bolatyn. Osyǵan arnaıy Úkimet tarapy, Densaýlyq saqtaý mınıstrligi qajetti jumysty atqaryp, birneshe sharalardy usynyp jatyrmyz. Jaqynda ǵana Úkimet otyrysynda biz alǵashqy medıtsınalyq kómektiń deńgeıinde ambýlatorııalyq uıymdardaǵy halyqqa berilgen medıtsınalyq qyzmetterdiń sapasyn kóterý jáne qoljetimdi etý týraly sharalardy engizdik», - deıdi Eljan Birtanov OKQ-da ótken baspasóz máslıhatynda.
Onyń aıtýynsha, birinshi másele - dárigerlerdiń jáne meıirbıkelerdiń bilimi men tájirıbesi.
«Qazirgi tańda birinshiden medıtsınalyq bilim berý uıymdaryndaǵy standarttar ózgertilip jatyr. Ótken jyldan bastap halyqaralyq áriptesterdi shaqyryp, olarmen qarym-qatynasty jolǵa qoıdyq. Búgingi tańda búkil medıtsınalyq bilim berý uıymdarynda, ýnıversıtetterde jańa baǵdarlamaǵa kóshtik. Ótken jyly kýrstan kýrsqa ótetin JPI deńgeıin kóterdik. Sonymen qazirgi tańda stýdentterdiń jaýapkershiligi arttyryp, bilim berý sapasyn arttyrý úshin osyndaı qadam jasaldy», - deıdi mınıstr.
Eljan Birtanov sonymen qatar, osy jyldan bastap «Syrtqy saraptama» júıesi engizilgenin atap ótti.
«Osyǵan deıin medıtsınalyq ýnıversıtetterde stýdenterdiń bilimin sol oqý ornyndaǵy muǵalimder baǵalaıtyn. Qazirgi tańda pılot túrinde «Syrtqy saraptama» júıesin ótkizip jatyrmyz. Ol úshin arnaıy mınıstrliktiń deńgeıinde ortalyq qurylǵan. Biz qazirgi Májiliske engizgen zań jobasynyń tarabynda osyndaı jańa baǵyt ashylady. Jyldan jylǵa mindetti túrde búkil stýdentter tek ýnıversıtetterde ǵana emes, medıtsınalyq kolledjderde jáne rezıdentter ınternatýrada oqyǵan dárigerler jalpy dárigerlik bilimmen qatar, Syrtqy táýelsiz saraptamadan ótedi. Osy saraptamanyń qorytyndysyna qaraı stýdentterdiń ary qaraı oqýdy jalǵastyra ma, joq pa sheshim qabyldaımyz», - dep túıdi Eljan Birtanov.
foto:news.kaznmu.kz