Medsaqtandyrý júıesin engizý kezinde HQKO-larda dúrbeleń týǵyzbaý kerek - Saǵyntaev
ASTANA. QazAqparat - Búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev mindetti áleýmettik medıtsınalyq saqtandyrýdy engizý kezindegi azamattardyń mártebesin rastaý jumystary barysynda halyqqa qyzmet kórsetý ortalyqtarynda dúrbeleńge jol bermeýdi tapsyrdy, dep habarlaıdy QazAqparat.
«Bul mindetti áleýmettik medıtsınalyq saqtandyrýmen baılanysty óte mańyzdy másele. Osy rette taǵy da azamattardyń tirkelý mártebesin rastaý qajet bolady. Azamattarymyz taǵy da Halyqqa qyzmet kórsetý ortalyqtaryna keledi. Men Aqparat jáne kommýnıkatsııalar mınıstri men «Azamattar úshin Úkimet» memlekettik korporatsııasyna azamattardy tirkeýmen baılanysty jaǵdaıdyń qaıtalanbaýyn tapsyramyn», - dedi Úkimet basshysy.
Premer-Mınıstr azamattardy tirkeý barysynda qıyndyqtardy boldyrmaýǵa baǵyttalǵan naqty tájirıbeniń bar ekendigin atap ótti.
«Biz adamdardyń eshqandaı dúrbeleńsiz tirkelip, tıisti qyzmetterdi qalaı júzege asyrýy kerektigin bilemiz. Jumysty durys jolǵa qoıý úshin ýaqyt jetkilikti boldy»,- dedi Baqytjan Saǵyntaev.
