Medsaqtandyrý: Ózin-ózi jumyspen qamtyǵan qaraǵandylyqtardan 12,3 mln teńge qarajat tústi

QARAǴANDY. QazAqparat – Qaraǵandy oblysynyń 11 myńnan astam turǵyny medıtsınalyq saqtandyrý qoryna biryńǵaı jıyntyq tólem (BJT) tóleıdi. Maýsym aıynda olardan qorǵa 12,3 mln teńgeden astam qarajat tústi, dep habarlaıdy QazAqparat tilshisi.

BJT ózin-ózi jumyspen qamtyǵandar úshin medıtsınalyq saqtandyrý júıesine qatysýdyń yńǵaıly tásili boldy. Ol birden tórt mindetti tólemdi qamtıdy: jeke tabys salyǵy; áleýmettik saqtandyrýdyń memlekettik qoryna áleýmettik aýdarymdar; BJZQ-ǵa zeınetaqy tólemderi; áleýmettik medıtsınalyq saqtandyrý qoryna aýdarymdar. Bul rette medıtsınalyq saqtandyrý qoryna tólem somasynyń 40 paıyzy túsedi.

2021 jyly BJT oblystyq jáne Respýblıkalyq mańyzy bar qalalarda turatyndar úshin 1 AEK (2 917 teńge) jáne basqa eldi mekenderdiń turǵyndary úshin 0,5 AEK (1 459 teńge) quraıdy.

«BJT aǵymdaǵy aıdyń alǵashqy kúnderinde nemese jańa aıdyń qarsańynda tólenýi tıis. Bul tólem aldyńǵy 3 aı úshin bereshek bolmaǵan jaǵdaıda tólengen kezeńge mártebe beredi. Jańa aı bastalǵanda ol úshin tólem bolmaǵan jaǵdaıda «saqtandyrylmaǵan» mártebesi bolady. Tólem jasalǵan kezde mártebe «saqtandyrylǵan» bolyp ózgeredi», – dep túsindirdi medıtsınalyq saqtandyrý qorynyń Qaraǵandy fılıalynyń bólim basshysy Svetlana Şetkına.

Osy jyldyń maýsym aıynda medıtsınalyq saqtandyrý qoryna oblys turǵyndarynan 2,7 mlrd teńge tústi. Bul jumys berýshilerdiń, derbes tóleýshilerdiń, jeke kásipkerlerdiń jáne BJT tóleýshilerdiń jarnalary men aýdarymdary.