Medsaqtandyrý qory eń jabyq kvazımemlekettik qurylymǵa aınaldy – Rahym Oshaqbaev
«Qazir áleýmettik medıtsınalyq saqtandyrý qory búkil kvazımemlekettik qurylymdardyń ishindegi eń jabyq qurylym bolyp otyr. Biz qorǵa túsken aqshanyń kólemin de, dınamıkasyn da, shyǵyndar kólemin de, tarıf saıasatyn da bilmeımiz. Veb-saıtyna qarasańyz, jyl saıynǵy qurǵaq esep qana bar. Syrttan salmaqty baqylaý joq. Qoǵamdyq tyńdaýlar nemese shyǵyndardyń ashyqtyǵy týraly parlamenttik tyńdaýlar sońǵy ret qashan bolǵanyn esińizge túsirip kórińiz. Biz búginde densaýlyq saqtaýǵa jumsaıtyn memlekettik shyǵystar men qosymsha tólemderdiń bárin osy qorǵa shoǵyrlandyryp qoıdyq», - dedi Rahym Oshaqbaev Densaýlyq saqtaý basshylarynyń II respýblıkalyq forýmynda sóılegen sózinde.
Sarapshy densaýlyq saqtaý júıesine shyǵyndar ósip jatqanymen, onyń tıimdiligi joq ekenin aıtty. Rahym Oshaqbaevtyń paıymynsha, bul kvazımemlekettik qurylymdar mınıstrlikter úshin yńǵaıly.
«Mysaly, zeınetaqy júıesiniń sapasyn qalaı jaqsartýǵa bolatyny týraly kez kelgen pikirtalasqa Eńbek jáne halyqty áleýmettik qorǵaý mınıstri, vıtse-mınıstri emes, zeınetaqy qory tóraǵasynyń orynbasary baıandama jasaıtyn ádet qalyptasqan. Densaýlyq saqtaý mınıstrligi de dál osyndaı ońaı jolmen ketip barady. «Aqsha senderde, jalaqy senderde, halyqaralyq saraptama senderde, tıisinshe esepti de sender berińder» degen ustanym. Jalpy, kvazımemlekettik qurylymdar bastaryn jınalystan shyǵarýy kerek. Biz osy eldiń azamaty retinde mınıstrlikten naqty fýnktsııalardy kvazımemlekettik sektorǵa silteı bermeı, ózderi oryndaǵanyn qalaımyz», - dedi sarapshy.