Medsaqtandyrý qory 3 mıllıonǵa jýyq patsıenttiń tisin emdetýge 5 mlrd teńge tóledi
Onyń ishinde 18 jasqa deıingi jáne júkti áıelderge josparly túrde 650 myńǵa jýyq qyzmet, halyqtyń jekelegen sanattaryna shuǵyl stomatologııa boıynsha 2,1 mln qyzmet, sondaı-aq balalarǵa ortodontııalyq kómek kórsetý boıynsha 1 707 qyzmet kórsetildi.
Eske salaıyq, MÁMS júıesinde josparly stomatologııalyq kómek 18 jasqa deıingi balalar men júkti áıelderge kórsetiledi.
Mindetti áleýmettik medıtsınalyq saqtandyrý júıesinde shuǵyl stomatologııalyq kómekti 18 jasqa deıingi balalar, júkti áıelder, Uly Otan soǵysynyń ardagerleri, 1, 2, 3 toptaǵy múgedekter, «Altyn alqa», «Kúmis alqa» medalimen marapattalǵan kópbalaly analar, ataýly áleýmettik kómek alýshylar, jasy boıynsha zeınetkerler, áleýmettik máni bar aýrýlarmen aýyratyndar, múgedek balaǵa kútim jasaıtyn jumys istemeıtin adamdar, bala kezinen birinshi toptaǵy múgedekke kútim jasaıtyn jumys istemeıtin adamdar ala alady.
Ortodontııalyq kómek jaqsúıek-bet anomalııalaryn joıýǵa arnalǵan apparatty paıdalana otyryp, jaqsúıek-bet aımaǵynyń týa bitken patologııasy bar 18 jasqa deıingi balalarǵa kórsetiledi.
Sondaı-aq, bıyldan bastap áleýmettik medıtsınalyq saqtandyrý qory MÁMS paketi boıynsha áleýmettik qorǵalmaǵan otbasylardan shyqqan balalardy-ataýly áleýmettik kómek alýshylardy qoldaýdy kózdedi. 6 jastan 12 jasqa deıingi balalarǵa túrli jaqsúıek-bet aımaǵynyń aýytqýlary (tistem buzylýlary, jaqtyń mıkrognotııasy) kezinde ortodontııalyq kómek kórsetiletin bolady. Bul kómekti 9 myńnan astam bala alady, osy jyldyń sońyna deıin 415 mln teńge qarastyrylǵan.
«Stomatologııalyq kómek alý úshin patsıent emhanaǵa da, stomatologııalyq klınıkaǵa da júgine alady. Bul rette stomatologııalyq qyzmet kórsetetin klınıka qordyń áleýetti ónim berýshisi bolyp tabylady jáne áleýetti ónim berýshiler tiziliminde bolýy mańyzdy», - dep atap ótti Áleýmettik medıtsınalyq saqtandyrý qory.
2020 jyldyń 1 qyrkúıektegi jaǵdaıǵa sáıkes, el boıynsha 626 medıtsınalyq mekeme stomatologııalyq qyzmet kórsetedi. Olardyń ishinde 346 memlekettik jáne 280 jeke klınıkalar.
«Shuǵyl jáne josparly stomatologııalyq kómek kórsetý patsıenttiń erkin tańdaýy negizinde júzege asyrylady jáne patsıenttiń tirkelgen jeri boıynsha ýchaskelik dárigerdiń joldamasynyń bolýy talap etilmeıdi. Qyzmet kórsetý faktisi jáne stomatologııalyq kómek kólemi aqparattyq júıede tirkeledi. Bul – Alǵashqy medıtsınalyq-sanıtarııalyq kómek uıymy men stomatologııalyq klınıkalar arasynda birlesip oryndaý shartyn jasaý úshin qajet. Ol aqparattyq júıede avtomatty túrde qalyptastyrylady», - dep túsindirdi qordaǵylar.
Kórsetilgen qyzmetterge aqy tóleý patsıenttiń tirkelgen jeri boıynsha medıtsınalyq-sanıtarııalyq alǵashqy kómek kórsetý uıymy arqyly júrgiziledi.
Medıtsınalyq kómek kórsetýden bas tartqan jaǵdaıda, áleýmettik medıtsınalyq saqtandyrý qoryna Qoldau 24/7 mobıldik qosymshasy arqyly júginý qajet, qosymshany Play Market jáne App Store arqyly ornatýǵa bolady.
