Medreseniń eń úzdik stýdentteri Nur Múbarak Mysyr Islam mádenıeti ýnıversıtetiniń granttaryna ıe boldy
ALMATY. Qyrkúıektiń 3-i. QazAqparat /Názıra Eleýhan/ - Búgin Almatyda Nur Múbarak Mysyr Islam mádenıeti ýnıversıteti jáne "Islam mádenıeti men bilimin qoldaý" qory eki jaqtyń Jarǵysy aıasynda kelisimshartqa otyrdy,
dep habarlaıdy QazAqparat.
Ol boıynsha «Islam mádenıeti men bilimin qoldaý» qory elimizdegi joǵary bilimdi ımamdar men ıslamtanýshy ǵalymdar daıarlaıtyn jalǵyz oqý ornynda tegin bilim alý úshin medreseniń eń ozat stýdentterine 15 oqý grantyn usyndy.
Alǵashqy grant ıegeri Astana Nur Múbarak medresesin qyzyl dıplommen támamdaǵan Nurlan Baqytjanulynyń aıtýynsha, bul bilsem, oqysam degen balalar úshin, ásirese oqýǵa materıaldyq jaǵdaıy joq jastar úshin zor kómek.
"Oqý bitirgennen keıin, ýnıversıtettiń túlekteri musylman qaýymynyń bereke-birligin damytýǵa, ıslam dininiń durys baǵytta órkendeýine úles qosatynyna senemin", dedi "Islam mádenıeti men bilimin qoldaý" qorynyń atqarýshy dırektory Balǵabek Myrzaev.
Qol qoıý rásiminde Balǵabek Myrzaev qordyń búgingi atqaryp jatqan jumystarymen bólisti. "Qazirgi ýaqytta qor elimizdiń musylmandyq uıymdary úshin ıslam dininiń negizderin úıretetin ádebıetterdi shyǵaryp, qarapaıym halyqtyń arasynda tegin taratyp, aımaqtarǵa jiberilip, ımamdarǵa tegin berilýde. Mundaǵy maqsat - jastarymyzdyń basqa dinı aǵymdarǵa ketip qalmaýyna yqpal etý. Óıtkeni, halyqtyń dinı saýattylyǵynyń tómendiginen, dinı kitaptardyń azdyǵynan qazirgi ýaqytta basqa dinge ketý jaǵdaılary oryn alýda. Qazir ondaı jaǵdaılardyń azaıǵandyǵymen, biz bul jumysty jalǵastyrýymyz qajet. Sol sebepti, biz bıylǵy jyldan bastap óńirlerge arnaıy úgit-nasıhat toptaryn quryp, jiberýdi josparlap jatyrmyz", dep atap ótti ol.
Onyń aıtýynsha, sonymen qatar, qajetti, mańyzdy dep tabylǵan dinı kitaptar shyǵarylýda. "Qazir tapsyrys boıynsha belgili ıslamtanýshy ǵalym Qaırat Joldybaıulynyń "Din men dil" atty kitabyn 25 000 danamen basyp shyǵaryp, elimizdiń túkpir-túkpirine taratatyn bolamyz. Sonymen qatar, bıylǵy jyly 200 myńǵa jýyq dinı ádebı kitaptardy shyǵarýdy josparlap otyrmyz. Bunymen qatar, din týraly derekti fılmderdi túsirýdi jáne "Imam" jýrnalyn shyǵarýdy qolǵa alǵaly otyrmyz. Sondaı-aq, eń jaqsy oqyǵan stýdentterdi ıslam dini jaqsy damyǵan, basqa aǵymdarǵa jol bermeıtin Saýd Arabııasynda, Túrik jáne Mysyr elderinde oqytýǵa jiberetin bolamyz", dedi ol. Onyń aıtýynsha, 11 adamnan turatyn qordyń negizgi maqsaty -ıslam mádenıeti, ǵylymy men biliminiń durys baǵytta damýyna kómektesý.
Ol sondaı-aq, kelesi jyly TMD elderiniń bas múftılerin, ıslam lıgasymen birge, elge shaqyratyndyǵyn habarlady.
