Medqyzmetkerler bir-birine qonaqqa barǵan, jınalyp shaı ishken: Almatyda eki jataqhana jabyldy

ALMATY. QazAqparat – Almatyda azamattyq avıatsııa ınstıtýtynyń jataqhanasy karantınge jabyldy. Bul týraly qalanyń bas sanıtar dárigeri Jandarbek Bekshın onlaın brıfıngte aıtty, dep habarlaıdy QazAqparat tilshisi.

«Almatyda ótken aptanyń sársenbisinde azamattyq avıatsııa ınstıtýtynyń jataqhanasy karantınge jabyldy. Turǵyndardyń barlyǵy basqa jataqhanalarǵa jáne qonaq úılerge jiberildi. Ǵımaratta dezınfektsııalyq sharalar júrgizildi», - dedi ol.

Bas sanıtar dáriger medıtsınalyq qyzmetkerlerdiń jataqhanasyna qatysty da aıtyp ótti.

«Almatyda 4 112 medıtsınalyq qyzmetker blokpost syrtynda turatyndyqtan olardy ornalastyrýǵa 20 jataqhana men 20 qonaq úı uıymdastyrylǵan bolatyn. Provızorlyq ortalyqtar, karantın statsıonarlarynda, ınfektsııalyq statsıonarda jumys isteıtin medıtsınalyq qyzmetkerler qonaq úıge jiberildi», - dedi J.Bekshın.

Onyń aıtýynsha, Almatyda medıtsınalyq qyzmetkerler turatyn eki jataqhana da jabylǵan.

«Medıtsınalyq qyzmetkerler sanıtarlyq normalardy saqtamaǵandyqtan jataqhanalar jabyldy. Olar oqshaýlaý tártibin ustanbaı, keshke jınalyp, shaı iship, bir-biriniń bólmesine qonaqqa barǵan. Mekeme basshylaryna olarmen profılaktıkalyq áńgime júrgizý týraly usynys berildi», - dedi ol.