Medkolledj stýdentteriniń bilimi tómen - Gúlmıra Jangereeva
NUR-SULTAN. QazAqparat - Elimizdegi medıtsınalyq kolledjder stýdentteriniń bilimi tómen. Bul týraly búgin «Ulttyq táýelsiz emtıhan alý ortalyǵy» RQB basqarmasynyń tóraıymy Gúlmıra Jangereeva aıtty, dep habarlaıdy QazAqparat tilshisi.
«Búgingi kúni Qazaqstan aýmaǵynda 85 medıtsınalyq kolledj bar. Onyń 26-sy memlekettik, al qalǵandary jergilikti ákimdikterge baǵynatyn jekemenshik kolledjder. Biz Densaýlyq saqtaý mınıstrliginiń qoldaýymen tek 27 medıtsınalyq kolledjge baǵalaý júrgizdik. Sebebi qalǵan kolledjder Densaýlyq saqtaý mınıstrligine baǵynbaıdy. Aıta keterligi, zertteýge úsh jekemenshik kolledj qatysty», - dedi ol búgin Senattaǵy "Óńir" depýtattyq tobynyń otyrysynda.
Onyń dereginshe, zertteýge qatysqan Mańǵystaý medıtsınalyq kolledji stýdentteriniń tek 2,2 paıyzy, Ońtústik Qazaqstan medıtsına kolledji stýdentteriniń 7,5 paıyzy ǵana alǵan bilimderin dáleldeı alǵan.
«Eń joǵary nátıjeni Qostanaı medıtsınalyq kolledji kórsetti. Onyń stýdentteriniń 98,8 paıyzy óz bilimderin dáleldeı aldy. Sonymen qatar Túrkistan kolledjiniń 96 paıyz, Shymkent joǵary medıtsına kolledjiniń 94,8 paıyz stýdenti bilimdi ekendigin kórsetti. Mamandyqtarǵa keler bolsaq, genetıkalyq epımedıologııa, meıirbıke isi mamandyqtary boıynsha oqýshylardyń daıyndyǵy joǵary. Al stamotologııa, ortoped syndy mamandyqtarda bilim deńgeıi óte tómen», - dedi Gúlmıra Jangereeva.
