Medqyzmet pen dári chekterinde JSN kórsetilýi múmkin
ASTANA. KAZINFORM — Qazaqstanda medıtsınalyq qyzmetter men dári-dármek úshin tólem jasaǵanda beriletin chekterde patsıenttiń JSN-i kórsetilýi múmkin.
QR Qarjy mınıstrligi baqylaý-kassalyq mashınalardy qoldaný tártibine ózgerister engizýdi kózdeıtin joba ázirledi. Qujatqa sáıkes, medıtsınalyq qyzmetter men dári-dármek aqysyn tóleý kezinde chekte patsıenttiń jeke sáıkestendirý nómirin (JSN) kórsetý mindettelýi múmkin.
Tıisti buıryq jobasy «Ashyq NQA» portalynda jarııalandy. Joba 2026 jylǵy 29 sáýirge deıin qoǵamdyq talqylaýǵa shyǵaryldy. Qujatta 2025 jylǵy 24 qazandaǵy №626 «Baqylaý-kassalyq mashınalardy qoldanýǵa qatysty keıbir máseleler týraly» Qarjy mınıstriniń buıryǵyna ózgerister engizý qarastyrylǵan.
Jańa túzetýlerge sáıkes, kassalyq chektiń mindetti derektemeler tizbesine medıtsınalyq qyzmetter men dári-dármek úshin tólem jasaǵanda patsıenttiń JSN-in kórsetýge arnalǵan qosymsha jol engiziledi.
Bul bastama Premer-Mınıstrdiń Áleýmettik medıtsınalyq saqtandyrý qory máseleleri boıynsha bergen tapsyrmasyn oryndaý aıasynda ázirlengen.
Ózgeristerdiń negizgi maqsaty – esep aıyrysýdyń ashyqtyǵyn arttyrý jáne Áleýmettik medıtsınalyq saqtandyrý qory qarajatynyń maqsatty ári tıimdi jumsalýyn baqylaýdy kúsheıtý. Qarjy mınıstrliginiń málimetinshe, bul jańashyldyq memlekettik kirister organdarynyń aqparattyq júıelerindegi derekterdi sáıkestendirýge múmkindik beredi. Sol arqyly saladaǵy kóleńkeli ekonomıkanyń úlesin azaıtýǵa yqpal etedi.
Sondaı-aq kassalyq chekterde patsıenttiń JSN-in kórsetý bıýdjet qarajatyn baqylaýdy kúsheıtip, medıtsınalyq qyzmet salasyndaǵy qarjylyq ashyqtyqty arttyrady.
Al jobanyń túsindirme jazbasynda bul ózgeristerdiń áleýmettik-ekonomıkalyq nemese ózge de teris saldary bolmaıtyny aıtylǵan.
Aıta keteıik, jyl basynan beri áleýmettik mindettemelerge memlekettik bıýdjetten 1,8 trln teńge bólingen.