Medıtsınalyq JOO-lar ınternatýrada 6 mamandyq boıynsha dárigerler daıarlap jatyr
ASTANA. KAZINFORM – QR Densaýlyq saqtaý mınıstrliginiń ǵylym jáne adamı resýrstary departamenti dırektorynyń orynbasary Ulmıra Nuralıeva medıtsınalyq JOO-larda bilim sapasyn arttyrýǵa baǵyttalǵan sharalar jaıly aıtyp berdi.
– Talaptyń kúsheıýi bolashaq dárigerlerdi sapaly daıyndaýǵa baǵyttalǵan. Qazirgi tańda medıtsına salasyn tańdaýǵa nıetti talapkerler sany óte kóp. Jyl saıyn bul mamandyqqa úlken konkýrs ótedi. Memlekettik grantqa túsý úshin de básekelestik joǵary – eń tómengi ótý baly 100-den asyp otyr. Bıyl talapkerlerge qoıylatyn talapty taǵy da kóterdik. Buryn eń tómengi shekti ball 60 bolsa, endi ony 70 balǵa deıin arttyrdyq. Óıtkeni dáriger bolý — úlken jaýapkershilik. Bul mamandyq ıelerine halyq tarapynan da únemi joǵary talap qoıylady, – deıdi ol Jibek Joly telearnasynyń «Búgin LIVE» baǵdarlamasyna bergen suhbatynda.
Sondaı-aq spıker elimizdegi JOO-larda medıtsına mamandary jańa bilim berý baǵdarlamasy boıynsha daıarlanatynyn aıtty.
– Jyl saıyn bakalavrıat deńgeıinde medıtsına mamandyqtaryna 2700 memlekettik grant bólinedi. Onyń sońǵy jyly – ınternatýra, ıaǵnı stýdentterdiń praktıkalyq jáne klınıkalyq tájirıbeden ótetin kezeńi. Buryn bul kezeńde biz tek jalpy praktıka dárigerlerin ǵana daıyndaıtynbyz. Alaıda sońǵy jyldary óńirlerdegi qajettilikti eskere otyryp, ınternatýrada alǵashqy medıtsınalyq-sanıtarlyq kómek kórsetýge baǵyttalǵan 6 mamandyq boıynsha dárigerler daıarlaı bastadyq. Qazirgi ýaqytta ınternatýrada 4 500-ge jýyq maman bilim alyp jatyr. Onyń shamamen 2 000-y – jalpy tájirıbelik dárigerler. Sonymen qatar, 1 000-ǵa jýyq bolashaq dáriger terapııa baǵyty boıynsha oqyp jatyr. Buǵan qosa, akýsher-gınekologııa, pedıatrııa, balalar hırýrgııasy jáne hırýrgııa sııaqty negizgi salalarda da mamandar daıarlanyp jatyr. Bul mamandyqtar – elimiz úshin asa qajet ári suranysqa ıe baǵyttar, – deıdi Ulmıra Nuralıeva.
Onyń aıtýynsha, bıylǵy basty ózgeristerdiń biri jańa mamandyqtardyń qosylýy. JOO-larda pedıatr mamandaryn daıarlaý úshin 14 jańa baǵyt ashylǵan.
– Búginde elimizde balalar arasynda aýrýshańdyq deńgeıi joǵary. Sonymen qatar balalar sany da jyl saıyn artyp keledi. Osyǵan baılanysty balalarǵa medıtsınalyq kómek kórsetetin mamandarǵa suranys kúsheıip otyr. Osy qajettilikti óteý úshin rezıdentýra deńgeıinde eń mańyzdy degen 14 beıindi mamandyq boıynsha daıarlaý baǵdarlamasy engizildi. Olardyń qatarynda anestezıolog, reanımatolog, endokrınolog, akýsher-gınekolog, hırýrg, gematolog, onkolog sekildi mamandyqtar bar. Bıyl osy baǵyttarǵa 118 granttyq oryn bólindi. Árıne, balalarmen jumys isteý – úlken jaýapkershilik, sondyqtan bul baǵytty tańdaýshylar sany az. Degenmen basty maqsat – balalar densaýlyǵyna qatysty máselelerdi sheshý, ásirese óńirlerdegi maman tapshylyǵyn joıý, – deıdi Ulmıra Nuralieva.
Aıta keteıik, bıyl jyl sońyna deıin aýyldarda 59 medıtsınalyq nysan ashylady.