DSM medıtsına uıymdarynyń qyzmetine monıtorıngti ne úshin engizbek
ASTANA. KAZINFORM -Medıtsınalyq kómektiń sapasyn basqarýdy jetildirýdiń 2026–2030 jyldarǵa arnalǵan keshendi josparynyń sheńberinde medıtsınalyq uıymdardyń 70%-yn lıtsenzııadan keıingi monıtorıngpen qamtý josparlanyp otyr. Sondaı-aq jańa standarttarǵa sáıkes mekemelerdiń keminde 80%-y akkredıtteledi.
QR Densaýlyq saqtaý mınıstrligi basspasóz qyzmetiniń habarlaýynsha, qujat medıtsınalyq qyzmetterdiń sapasyn baqylaý men basqarýdyń derekterge, tsıfrlyq tehnologııalarǵa jáne jasandy ıntellekt quraldaryna negizdelgen zamanaýı modeline kóshirýge baǵyttalǵan.
Qujatta júıeni damytýdyń tórt strategııalyq baǵyty aıqyndalǵan:
medıtsınalyq qyzmet kórsetý salasyndaǵy retteý quraldaryn jańǵyrtý;
jasandy ıntellekt tehnologııalaryn qoldana otyryp sapa saraptamasynyń jańa modelin qalyptastyrý jáne Ulttyq sapa ınstıtýtyn qurý;
kásibı medıtsınalyq qoǵamdastyq pen patsıentterdiń rólin kúsheıtý;
sapany basqarý júıesin tsıfrlyq transformatsııalaý.
Negizgi maqsat — patsıent medıtsına qyzmetkerleriniń sapasyn baǵalaý jáne baqylaý protsesteriniń belsendi qatysýshysyna aınalatyn model qalyptastyrý.
Jospardy iske asyrý medıtsınalyq kómektiń sapasyn retteýdiń biryńǵaı júıesin qurýǵa, medıtsınalyq uıymdar qyzmetiniń ashyqtyǵyn arttyrýǵa jáne basqarýshylyq sheshimderdi obektıvti derekter negizinde qabyldaýǵa múmkindik beredi.
Zańnamalyq ózgerister sheńberinde 2028 jyldan bastap TMKKK/MÁMS jetkizýshilerin mindetti akkredıtteý jáne akkredıtatsııadan keıingi monıtorıngti tsıfrlandyrý talaptaryn engizý kózdelgen.
Sondaı-aq Ulttyq ǵylymı densaýlyq saqtaýdy damytý ortalyǵynyń bazasynda ádisnamalyq jáne taldamalyq ortalyq retinde qyzmet atqaratyn Ulttyq sapa ınstıtýtyn qurý josparlanyp otyr.
Budan bólek, medıtsınalyq kómektiń sapasyn basqarý protsesterinde medıtsınalyq qaýymdastyq pen patsıentterdiń rólin kúsheıtý kózdelgen. Kásibı birlestikter sapaǵa táýelsiz saraptama júrgizýge jáne mamandardyń klınıkalyq oılaýyn baǵalaýǵa tartylady.
Sonymen qatar patsıentterdi qoldaý qyzmetteriniń qyzmetin tsıfrlandyrý azamattardyń ótinishterine naqty ýaqyt rejıminde jedel áreket etýge múmkindik beredi.
- 2028 jylǵa deıin medıtsınalyq kómekti kórsetý standarttary men qaǵıdalaryn tolyq tsıfrlandyrý, al 2027 jyly sapany saraptaýdyń úsh komponentti modelin engizý de josparlanyp otyr. 2028 jylǵa qaraı medıtsınalyq kómektiń sapasy men kólemin monıtorıngteýdiń keminde 20%-y jasandy ıntellekt tehnologııalaryn qoldaný arqyly júzege asyrylatyn bolady, - delingen habarlamada.
Osyǵan deıin densaýlyq saqtaý mınıstrligi eldegi pedıatrııalyq qyzmetti kúsheıtip jatqany týraly jazdyq.
