Medıtsınalyq uıymdarda qomaqty somadaǵy qaryz neden boldy
ASTANA. KAZINFORM — QR Densaýlyq saqtaý mınıstrligi qomaqty somada qaryzy bar medıtsınalyq uıymdarǵa qatysty túsinik berdi.
«2024 jylǵy 20 qańtardaǵy jaǵdaı boıynsha medıtsınalyq uıymdardyń kredıtorlyq bereshegi 82,3 mlrd teńgeni qurady. Medıtsınalyq uıymdardyń jedel derekterine qaraǵanda, bıylǵy 20 naýryzda kredıtorlyq bereshek 75,9 mlrd teńgege deıin azaıdy. Onyń paıda bolýynyń negizgi sebepterine toqtalsaq, medıtsınalyq uıymdardaǵy basshylarynyń basqarýshylyq sheshimderi (menedjmenttiń tómen deńgeıi) áser etti. Bul turǵyda, medıtsınalyq kómek kórsetý standarttaryn buzý, kredıtorlyq bereshek bolǵan kezde saralanǵan tólemdi jáne syılyqaqy tóleýdi ulǵaıtý, tósek qoryn utymsyz paıdalaný jaǵdaılary kezdesti. Ekinshiden, dárilik zattar men medıtsınalyq qural-jabdyqtardy satyp alý jáne jumsaý protsesinde analıtıkanyń bolmaýy yqpal etti. Úshinshiden, ınflıatsııa deńgeıin eskere otyryp, tarıfti ındeksteý eskerilmegen», — delingen mınıstrliktiń Kazinform agenttigine bergen jaýabynda.
2024 jylǵy 22 aqpanda ótken Densaýlyq saqtaý mınıstrliginiń keńeıtilgen alqa otyrysynda kredıtorlyq bereshekti tómendetý boıynsha mynadaı qysqa merzimdi sharalar usynyldy:
— kredıtorlyq bereshekti qysqartýdyń qabyldanyp jatqan sharalary boıynsha densaýlyq saqtaý basqarmalary jáne medıtsınalyq uıymdar basshylarynyń esep berý tájirıbesin engizý;
— statsıonarlarda klınıkalyq farmakologtyń rólin kúsheıtý nemese qaýymdastyqtarmen balamaly ózara árekettesý boıynsha jumysty atqarý;
— halyqqa medıtsınalyq uıymdardyń qarjylyq jaǵdaıy boıynsha bas dárigerlerdiń esepterin jarııalaý tájirıbesin engizý;
— qarjy qyzmetkerleri men medıtsınalyq uıymdarynyń menedjment qyzmetkerlerin oqytý.
«Joǵaryda atalǵan usynystar QR Densaýlyq saqtaý mınıstriniń 2024 jylǵy 14 naýryzdaǵy № 152 buıryǵymen bekitilgen medıtsınalyq uıymdardyń kredıtorlyq bereshegin ońtaılandyrý arqyly qarjylyq turaqtylyqty jaqsartý is-sharalar josparynda eskerilgen.
Budan buryn habarlanǵandaı, jyldyń basynda elimizde nesıe bereshegi bar medıtsınalyq uıymdardyń jaǵdaıy tekserilip jatqany belgili boldy.
Sol kezde Densaýlyq saqtaý mınıstri Aqmaral Álnazarova 400-den astam medıtsınalyq uıymnyń 82 mlrd teńge somasynda nesıe bereshegi baryn aıtty.
