Medıtsınalyq uıymdar táýekel aımaqtaryna bólinbek

ASTANA. KAZINFORM — Áleýmettik medıtsınalyq saqtandyrý qory medıtsınalyq qyzmetter sapasyna monıtorıng júrgizý ádisterin jetildirý aıasynda táýekelderdi basqarý júıesin engizedi.

Bul jaıynda Májilis janyndaǵy Qoǵamdyq palatanyń kóshpeli otyrysynda atalǵan qor tóraǵasynyń orynbasary Indıra Sarkenova aıtty.

Onyń atap ótýinshe, táýekelderdi basqarý júıesin engizý medıtsına uıymdaryn tómen, ortasha nemese joǵary táýekel aımaqtaryna bólýge múmkindik beredi. Bul rette qyzyl, sary jáne jasyl aımaqqa bólý arqyly reıtıng ázirlenedi.

— Eger klınıkada medıtsınalyq kómek kórsetý barysynda zań buzýshylyq pen aýytqý bolmasa, onda ol avtomatty túrde jasyl aımaqqa túsedi. Bul óndiristik bazaǵa baryp monıtorıng júrgizý nemese onyń qyzmetin jiti zerdeleý qajettigin joq ekenin bildiredi. Bul jetkizýshilerdi qajetti normalar men erejelerdi saqtaýǵa yntalandyrady, — dedi Indıra Sarkenova.

Qor tóraǵasy orynbasarynyń aıtýynsha, sary jáne qyzyl aımaqqa tap bolǵan medıtsınalyq uıymdardyń medıtsınalyq kómek kórsetý sapasy jan-jaqty zerdelenip, kelisimshart mindettemelerine monıtorıng júrgiziledi.

— Qorytyndysynda medıtsınalyq kómek kórsetý protsesterin jetildirý boıynsha usynymdar men sheshimder ázirlenedi, — dedi ol.

Onyń paıymynsha, jetkizýshilerdiń jartysynan kóbi jasyl ne sary aımaqqa, al shamamen 41 paıyzy qyzyl aımaqqa tap bolady.

Aıta keteıik, osyǵan deıin QR Densaýlyq saqtaý mınıstrligi qomaqty somada qaryzy bar medıtsınalyq uıymdarǵa qatysty túsinik berdi.